Biz terrorızmge qarsy soǵysa beremiz jáne bul óte uzaq soǵys bolady - Frantsııa Elshisi

ASTANA. QazAqparat - Dúısenbi, 18 shilde kúni Astanada ornalasqan Frantsııa Elshiliginiń aldynda kóńil aıtý kitaby ashylady. Astana turǵyndary men ózge de azamattar frantsýz halqyna osylaı qoldaý bildire alady. «QazAqparat» tilshisimen suhbattasqan Frantsııa Respýblıkasynyń Qazaqstan Respýblıkasyndaǵy Tótenshe jáne ókiletti elshisi Fransıs Eten 14 shilde kúni túnge taman oryn alǵan Nıtstsa qalasyndaǵy teraktige baılanysty, qazaqstandyqtar 15 shilde kúni tańerteńnen Frantsııa elshiligine kóńil aıtý hattaryn joldaı bastaǵanyn aıtty.

«Qazir qaıǵy jutyp otyrmyz. Aıaq astynan jaqynynan aıyrylyp, osyndaı qandy oqıǵaǵa kýá bolǵan azamattardy oılasaq, júregimiz aýyrady. Men buǵan deıin aıtqamyn, áli de aıtamyn: biz terrorızmge qarsy soǵysty toqtatpaımyz. Bul óte uzaq soǵys bolady... Eger olardyń (terrorısterdiń - agenttik) kózdegeni bizdiń qınalyp, qulaǵanymyz bolsa, olardyń qolynan bul kele qoımas. Sebebi, bul birinshi ret bolyp otyrǵan jaǵdaı emes. Bizdiń sımvolymyz - kúsh ekenin aıtqym keledi. Frantsýz halqy qulamaıdy»,-deıdi elshi.
Elshiniń aıtýynsha, kúni boıy Qazaqstannyń azamattary Frantsııa halqyna qoldaý bildirip, tolassyz hattar joldap jatyr eken. Elshi atap ótkendeı, dúısenbi, ıaǵnı, 18 shilde kúni Frantsııa Respýblıkasynyń Qazaqstan Respýblıkasyndaǵy Elshiliginiń aldynda (Astana qalasy, Kosmonavtar kóshesi,62) kóńil aıtý kitaby ashylady. Sondaı-aq, Fransıs Etenniń aqparatyna súıensek, erteń Elshilikke QR Premer-mınıstri Kárim Másimov barady dep kútilýde.
Esterińizge sala keteıik, 14 shilde kúni Frantsııa Respýblıkasynyń Nıtstsa qalasynda 80-nen astam adamnyń ómirin qıǵan terakt oryn aldy.