Biz tek qorǵanysta jatyp almaı, tamasha oıyn kórsetýge tyrysamyz - Qazaqstan quramasynyń bapkeri B. Shtork
ASTANA. Qyrkúıektiń 7-si. QazAqparat - Búgin, qyrkúıektiń 7-si kúni «Eýro-2012» chempıonatynyń irikteý týrnıri aıasynda Avstrııa - Qazaqstan kezdesýi ótedi. Sol matchtyń qarsańynda Zaltsbýrg qalasynda Qazaqstan quramasynyń Bas bapkeri Bernd Shtork jýrnalıstermen baspasóz máslıhatyn ótkizdi. Mass-medıalyq shara Avstrııanyń 20-ǵa tarta sport jýrnalısterin jınady, dep habarlaıdy QazAqparat Qazaqstannyń Fýtbol qaýymdastyǵynyń baspasóz qyzmetine silteme jasap.
«Biz osynda kelgenimizge qýanyshtymyz. Biz aldaǵy matchtyń favorıtteri emes ekenimizdi bilemiz. Avstrııa quramasy - nemisterdiń býndeslıgasynda óner kórsetetin óte jas oıynshylardan quralǵan myqty komanda. Degenmen biz tek qorǵanysta jatyp almaı, shabýylǵa shyǵyp, tamasha oıyn kórsetýge tyrysamyz», dedi máslıhat basynda B. Shtork.
- Siz Avstrııa quramasy jóninde jáne ondaǵy oıynshylar týraly ne bilesiz?
«Aldynda atap kórsetkenimdeı, Avstrııanyń búgingi quramasy - jas komanda. Men olardyń qatysýymen ótken matchtardy qarap shyqtym. Sizderdiń quramalaryń Shveıtsarııa jáne Horvatııamen ótkizgen oıynda epti kórindi. Olardyń ishinde ıAnko, Fýks jáne qaqpashy Machony atap óter edim».
- Óz quramalaryńyz ben Avstrııa quramasyn salystyryp kórińizshi?
Salystyrý orynsyz bolar. Biz FIFA reıtingisinde 125-shi orynda turmyz. Avstrııada baı dástúr men tarıh bar. Sizderdiń quramalaryńyzda irikteý syndaryndaǵy úlken tájirıbesi bar. Qurama fýtbolshylary qazir 1-shi býndeslıgada oınap júrgendigin bilemin, alaıdy jaqynda ǵana qurama oıynshylary Germanııa lıgasynyń ekinshi ranjıri boıynsha óner kórsetip júrgen oıynshylar bolatyn. Meniń jigitterime keletin bolsaq, olardyń klýbtyq deńgeıde bolsyn, qurama deńgeıinde bolsyn halyqaralyq tájirıbeleri jetispeıdi.
- Qazaqstan quramasymen ótkizetin matchqa sizderdiń qarsylastaryńyz negizgi qurammen áli anyqtalmaǵandyǵy jóninde ne oılaısyz?
Iá, men ol jaıly habardarmyn. Degenmen bul oqıǵa Avstrııa komandasynyń myqtylyǵyn azaıtyp turǵan joq. Biz úshin kezdesý jeńil tıedi dep oılamaımyn. Túrkııadan kórgen jeńilisimizdi kóńil-kúı deńgeıinde eńserý ońaıǵa soqpady. Sol matchta dop soǵýǵa múmkindigimiz bolǵandyǵyn eskergenniń ózinde. Eger biz osy matchta jeńiske jetsek - bul úlken tosyn syı bolmaq.
- Atalmysh irikteý týrynda sizderdiń komandalaryńyz qandaı maqsat qoıyp otyr?
Aǵymdaǵy jyly ótetin matchtarda kem degende 3 upaı jınaý. Al meniń kelisimshartym jyl sońynda aıaqtalady. Eger tsıkldyń jalpy tujyrymdamasyna keletin bolsaq, bizge Ázirbaıjannan asyp túsý mańyzdy.
- Qazaqstan quramasymen jumys ótkizýińizdiń motıvatsııasy nede?
Men komandada 2008 jyldan beri jumys jasap kelemin. Qazir mende jas komanda jáne maǵan bul jigittermen jumys jasaǵan qatty unaıdy. Bizde Reseı jáne Germanııa klýbtarynda oınaıtyn fýtbolshylar bar. Biz damyp kelemiz - bul jaıt qatty qýantady.
- Sizdiń komandańyzdyń kemshilikterin ataısyz ba?
Atamaımyn... (kúlip)
- Túrkııamen ótken kezdesýge túsinikteme bere ketseńiz?
Jeńilisten keıin men komandanyń óz-ózine kelýine, jınalýyna qatty kúsh salamyn. Sol matchta bizdiń kúshimiz tek 70-80 paıyzǵa ǵana jetti. Al biz bul matchta barlyq 100 paıyzǵa daıyn bolýymyz mindetti edi. Aldaǵy kezdesýge biz psıhologııalyq turǵyda daıyndalyp jatyrmyz.
- Zaltsbýrgtegi oıynǵa qurama forvardy Ostapenkony nege almadyńyz?
Ol óziniń óner kórsetetin klýby «Lokomotıvtiń» qol astyna ketti. Onyń jattyǵý jáne oıyn protsesine degen qarym-qatynasy maǵan unamaıdy. Sondyqtan Ostapenko bizben birge Avstrııada bolmaıdy dep sheshtim.
