Biz tek bir maqsat úshin jumys istedik - shańǵy jarysyndaǵy mass-start jeńimpazdary
ALMATY. 6 aqpan. QazAqparat /Elena Ilınskaıa/ - Biz tek bir maqsat úshin jumys istedik. Bul týraly marapattaý rásiminen keıin shańǵy jarysyndaǵy mass-starttyń júldegerleri Alekseı Poltoranın men kúmis jeńip alǵan Sergeı Cherepanov málimdedi.
"Basty maqsatymyz altyn jeńip alý boldy. Oǵan jetý úshin saıystyń basynan-aq biz Sergeı Cherepanov ekeýimiz birge jumys istedik. Japondyq sportshy jarys boıy alda keldi, márege 3-4 shaqyrym qalǵanda ǵana, biz ony qýyp jetip, keıinnen ozyp kettik. Japondyq artta qalǵannan soń, men komandalyq áriptesimmen jarysa bastadym. Meniń jolym boldy", dep atap ótti altyn ıegeri A.Poltoranın.
Qazaqstandyq shańǵyshy Sergeı Cherepanov 30 shaqyrymdyq klassıkalyq júristegi mass-start máresine óziniń otandasy Alekseı Poltoranınnen jarty sekýndqa keshigip jetti. Osyǵan qaramastan, Cherepanov esh ókingen joq: "Alekseı Poltoranın ekeýimiz bir maqsatqa - altyn medal jeńýge birge umtyldyq. Jattyǵý kezderinde talaı ret toptyq jarys elementterin jasap, shynyqtyq. Sondyqtan bir-birimizdi jaqsy túsinemiz. Jarys óte qyzyqty ótip, Azıadany laıyqty aıaqtady. Búgingi kórsetkishimizge "bes" degen baǵa qoıamyn. Kúmis alǵanyma túk te renjimeımin. Eń bastysy, altyn Qazaqstanda qalady. Bizge eń mańyzdy estafeta men mass-start jarystaryn jeńý kerek edi. Aýyr tıse de, biz alǵa qoıǵan mindetti oryndap shyqtyq. Jankúıerlerge de myń alǵys! Qoldaýǵa kelgen jandardyń aldynda búgin jeńilýge qaqymyz bolmady", - dedi ol.
