«Biz Táýelsiz eldiń negizin qaladyq, irgetasyn bekittik» - respýblıkalyq basylymdarǵa sholý
***
«Egemen Qazaqstan» gazetiniń jazýynsha, keshe Úkimet úıinde Premer-Mınıstr Kárim Másimovtiń qatysýymen Qazaqstan Úkimeti men Karachaganak Petroleum Operating konsortsıýmy arasyndaǵy problemalyq máselelerdi úılestirý týraly kelisimge qol qoıý rásimi ótti. Kelisim-shart boıynsha Qazaqstannyń Qarashyǵanaq jobasyndaǵy úlesi 10 paıyzdy quraıtyn boldy. Qol qoıý rásiminen soń jýrnalısterge arnaıy baspasóz máslıhatyn ótkizgen Munaı jáne gaz mınıstri Saýat Myńbaev: «Eger Qazaqstan Respýblıkasy múddesi turǵysynan alatyn bolsaq, 5 paıyz úlesti memlekettik organdardyń narazylyǵyn retteýge almastyratyn boldyq. Qalǵan 5 paıyzyn rynoktyq baǵamen esh salyqsyz 1 mlrd. dollarǵa satyp alatyn bolamyz. Nátıjesinde, «QazMunaıGaz» UK» AQ 10 paıyzdyq úlespen jobanyń qatysýshysyna aınalyp otyr», - degen. Maqala «Qazaqstan 10 paıyz úles aldy» degen taqyryppen berilgen.
«Prezıdent Nursultan Nazarbaevtyń Jarlyǵymen elimizdiń qoǵamdyq qaýipsizdigin qamtamasyz etý barysynda ózine tapsyrylǵan mindetti adal atqaryp, beıbit adamdardyń ómirin qıǵan asa qaýipti lańkes-qylmyskerdi quryqtaý kezinde erlikpen qaza tapqan oblystyq ІІD Jol polıtsııasy jeke batalonynyń 1-shi vzvod komandıri, polıtsııa kapıtany Ǵazız Ábdibekuly Baıtasovqa «Halyq Qaharmany» ataǵy berildi», - dep jazady «Egemen Qazaqstan» gazeti búgingi sanynda jaryq kórgen «Erlik el esinde qalady» degen taqyryptaǵy maqalasynda. Basylymnyń atap ótýinshe, ózin «jıhadtyń» jolyn ustaýshymyn dep sanaıtyn qylmysker aıdyń-kúnniń amanynda Taraz qalasynda esh jazyǵy joq 7 adamnyń, onyń ishinde ishki ister organdarynyń 3 polıtseıi men UQK-niń 2 qyzmetkerin mert qylyp jáne 3 qoǵam saqshysynyń denesine jaraqat salyp, ómirine qaýip tóndirdi. Osy tula boıdy túrshiktirer oqıǵa kezinde tarazdyq beıbit turǵyndardyń ómirin saqtaý úshin qaraqshy atqan oq keýdesin tesip ótkenine qaramastan, jarylys jasaǵan «jıhadshyny» denesimen japqan jol polıtsııasynyń kapıtany Ǵazız Baıtasov erlikpen qaza tapty.
***
Tarıhı derekter qazaq qazaq bolǵaly Táýelsizdik jolynda 300-den astam irili-usaqty kóterilis bolǵanyn aıtady. Bul - Táýelsizdik jolynda qan az tógilmegeniniń aıǵaǵy. Óıtkeni táýeldilik, buǵaý bar jerde kúres eshqashan toqtamaıdy. Jeltoqsan kóterilisi - san ǵasyrlar boıy ata-babamyz armandaǵan azattyq jolyndaǵy kúresterdiń zańdy jalǵasy, Táýelsizdik jolyndaǵy tógilgen sońǵy qan. Bul jaıynda, naqty aıtqanda Jeltoqsan kóterilisi jaıynda «Aıqyn» gazetiniń beısenbilik sanynda berilgen «Ǵasyrǵa bergisiz eki kún» degen maqalada egjeı-tegjeıli baıandalǵan. «Boıynda kóshpendi eldiń qyzý qany oınaǵan, erkindikti kıe tutqan qazaq degen ór halyqtyń, er halyqtyń urpaǵy Jeltoqsanda aıdaı álemge shegine berýdiń, buǵa berýdiń, ıile berýdiń shegi jetkenin pash etti. Eń bastysy - Jeltoqsan keýdesinde oty bar, namysy bar, jalyny bar jastardyń úlken toby qalyptasqanynyń, ushy qıyryna kóz jetkisiz alyp dalanyń bir pushpaǵynyń da kezinde jaý qolynda týlaqqa aınalyp ketpeı, atadan balaǵa, urpaqtan-urpaqqa amanat etip tapsyrǵan, tolarsaqtan saz keshken áıgili batyr babalarynyń laıyqty izbasary barynyń aıǵaǵy edi», - dep jazady basylym.
***
Keshe Elbasy ózi aıtqandaı óziniń qanattas seriktesterin, sondaı-aq Táýelsiz elimizdiń keleshegi úshin ter tókken azamattardy Táýelsizdiktiń 20 jyldyq mereıtoıymen quttyqtap, Jarlyǵymen taǵaıyndalǵan «Qazaqstan Respýblıkasynyń Táýelsizdigine - 20 jyl» medalimen jáne ózge de ordendermen marapattady. Osyǵan oraı «Alash aınasy» gazetinde «Biz Táýelsiz eldiń negizin qaladyq, irgetasyn bekittik» degen taqyryppen maqala jarııalandy. «Bul medaldiń orny aıryqsha» dep baǵa bergen Elbasy Nursultan Nazarbaev el egemendigin alǵan tustan bastap ózimen úzeńgiles bolyp irgeli ister atqaryp júrgen, sondaı-aq memleketti alǵa súıreýde uly isterge muryndyq bolyp júrgen azamattardyń eńbekterin baǵalap, Úkimet basshysy Kárim Másimovten bastap, bıliktiń tutqasyn ustaǵan biraz azamattarǵa jáne elimizdiń barlyq oblys jáne qala ákimderine osy medaldi tabys etti», - dep jazady basylym.
«Alash aınasy» gazetiniń turaqty «Dat!» aıdarynda akademık, zań ǵylymynyń doktory, professor Sultan Sartaevpen aradaǵy suhbat «Teorııalyq, tájirıbelik jaǵynan ekinshi Táýelsizdikke qol jetkizdik, bul - naǵyz bostandyqtyń negizinde qurylǵan Táýelsizdik» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ǵalym: «Táýelsizdikke búkil halyq bolyp úles qosty. Al onyń ishinen bes-alty adamdy bóle-jara atap ótsem, shalaǵaılyq bolady, osy azamattar ǵana Táýelsizdigimizge qol jetkizdi desem, durys bolmaıdy. Táýelsizdikke bastaǵan azamattardyń ishindegi biregeıi - N.Nazarbaev», - deıdi. Suhbattyń tolyq nusqasyn oqyǵyńyz kelse, basylymnyń búgingi sanyn jiberip almańyz.
***
«Kazahstanskaıa pravda» gazetiniń jazýynsha, keshe Premer-Mınıstr Kárim Másimovtiń tóraǵalyǵymen «Samuryq-Qazyna» ulttyq ál-aýqat qory» AQ-tyń dırektorlar keńesiniń kezekti otyrysy ótti. Onda «Samuryq-Qazyna» AQ-tyń 2011-2015 jyldarǵa arnalǵan damý jospary bekitildi. Josparda qyzmettiń sheshýshi kórsetkishteriniń strategııalyq óndiristik, qarjylyq, áleýmettik, ındýstrııalyq-ınnovatsııalyq toptary kórinis tapqan. Sondaı-aq josparda 2010-2014 jyldarǵa arnalǵan memlekettik údemeli ındýstrııalyq-ınnovatsııalyq damý baǵdarlamasyna, ındýstrııalandyrý kartasyna jáne basqa da salalyq baǵdarlamalarǵa engen strategııalyq ınvestıtsııalyq jobalar qamtylǵan.
