Biz shepten shyqqan joqpyz – qaqtyǵys kezinde jaralanǵan jaýynger
QR Ulttyq ulany «Batys» óńirlik qolbasshylyǵynyń baspasóz hatshysy, podpolkovnık Erbolat Sultanovtyń aıtýynsha, Atyraýdaǵy tártipsizdikter kezinde 28 sarbaz túrli jaraqat aldy.
Sonyń biri – Batys Qazaqstan oblysy Jánibek aýdany Taý aýylynda týyp-ósken Dıas Samat.
Atyraý qalasynda ol qyzmet etetin 5546-áskerı bólim jaýyngerleri 5 qańtar kúni oblys ákimdigi ǵımaraty turǵan ortalyq alańda shep quryp, sondaı-aq áskerı qalashyq pen qarý-jaraq qoımalaryn kúzetip turdy.
«Bastapqyda beıbit mıtıngi boldy. Bizge beıbit halyqqa kúsh qoldanbaı, tártipti qamtamasyz etý jóninde buıryq boldy. Alaıda kenetten belgisiz jastar bizge shabýyl jasap, qolǵa túsken tas, temirdi laqtyrdy. Gaz ballonshalaryn qoldandy. Áp-sátte aınala tóbeleske aınalyp ketti. Aldyńǵy lekte turǵan meniń oń jaq samaıyma tas pa, trotýar synyǵy ma, qatty bir nárse tıip, qan aqty. Qatardaǵy qyzmettesterim alǵashqy medıtsınalyq kómek kórsetti. Alǵan jaraqatyma qaramastan, shepti tastap ketpeı, áskerı mindetimdi oryndaýdy jalǵastyra berdim», dedi D.Samat.
Atyraý qalasynyń turǵyny Gúljaına Alpysbaeva úlgili tártip pen batyldyq, uıymshyldyq tanytqan Ulttyq ulan jaýyngerleri men polıtsııa qyzmetkerlerine alǵys bildirdi.
«Osynaý qıyn kúnderi sarbazdar Qazaqstan halqy men áskerı antqa adaldyǵyn kórsete bildi. Mundaı mysaldar az emes», dedi 5546-áskerı bólim komandıri, podpolkovnık Manat Naýkeev.
Qazirgi kezde atalmysh bólimniń jeke quramy Atyraýda polıtsııa men Qarýly kúshtermen birge blokpostarda qyzmet etýde, mańyzdy memlekettik nysandardy, áýejaı men temirjol vokzalyn kúzetýde.
Eske sala keteıik, budan buryn Oralda Ulttyq ulan sodyrlarmen urysta qaza tapqan bozdaqtardy eske alǵanyn jazǵan bolatynbyz.
