Biz – rýhy asqaq, birligi bekem, eńsesi bıik halyqpyz - Qasym-Jomart Toqaev
NUR-SULTAN. QazAqparat – Muqtaj adamdarǵa naqty kómek kórsetiledi. Bul týraly respýblıkalyq telearnalardyń efırinen elimizdegi tótenshe jaǵdaıǵa jáne memlekettiń daǵdarysqa qarsy is-sharalaryna baılanysty málimdemesinde Prezıdent Qasym-Jomart Toqaev aıtty, dep habarlaıdy QazAqparat tilshisi.
«Koronavırýs indetine baılanysty barshamyz kúrdeli kezeńdi ótkerip otyrmyz. Biraq, bul – ýaqytsha qıyndyq. Biz ony mindetti túrde jeńemiz! Búkil álem kúresýde. Biz de bar kúsh-jigerimizdi salamyz. Biz, memleket jáne qoǵam bolyp barsha azamattarymyzǵa qoldaý kórsetemiz, eshkimdi kómeksiz qaldyrmaımyz. Muqtaj adamdarǵa qol ushyn beremiz. Buǵan eshqandaı kúmán bolmaýy kerek», - dedi Memleket basshysy.
Osy oraıda Prezıdent eń bastysy, shydamdylyq, tózimdilik jáne jaýapkershilik tanytýǵa shaqyrdy.
«Biz – rýhy asqaq, birligi bekem, eńsesi bıik halyqpyz. Sondyqtan, bul synaqtan da súrinbeı ótip, qıyndyqty birge eńseremiz dep senemin. Basty toılarymyz áli alda. Tórt qubylamyz túgel bolsyn, aǵaıyn! Biz birgemiz!», - dedi Qasym-Jomart Toqaev.
Budan buryn habarlanǵandaı, Memleket basshysy 42 500 teńge kólemindegi kómekti alatyn azamattardyń sanaty keńeıtiletinin aıtty.
Sonymen qatar Prezıdent elimizde koronavırýsqa baılanysty dúrbeleń týǵyzýǵa jol berilmeıtinin atap ótti.
