Biz óz halqymyzǵa senýimiz kerek - Ombýdsmen qańtar qatysýshylaryna raqymshylyq týraly

NUR-SULTAN. QazAqparat - Qazaqstandaǵy adam quqyqtary jónindegi ýákil Elvıra Ázimova búgingi Prezıdent Joldaýyna qatysty pikir bildirdi, dep habarlaıdy QazAqparat.

«Búgin Parlament sessııasynyń otyrysy barysynda Memleket Basshysy Qasym-Jomart Toqaev óz Joldaýynda qańtar oqıǵalaryna qatysqandarǵa qatysty ishinara raqymshylyq jasaý týraly sheshim qabyldady. Bul sheshim quqyq qorǵaý qoǵamdastyǵy men aıyptalýshylar, sottalǵandar arasynda erekshe atap ótildi», - dep jazdy Elvıra Ázimova Facebook paraqshasynda.

Ombýdsmenniń aıtýynsha, qańtardaǵy oqıǵalar - biz úshin úlken tragedııa, sondyqtan naǵyz quqyq buzýshylyq jasaǵandardyń áreketin eshkim aqtamaıdy.

«Ókinishke qaraı, biraz adam mundaı jaǵdaıǵa alǵash ret tap boldy. Olardyń kóbi jappaı tártipsizdikke kópshiliktiń yqpalymen jáne ózderiniń basyndaǵy áleýmettik problemalarǵa baılanysty qatysqany anyq. Olardyń birazy kinásin túsinip, ókinip otyr. Raqymshylyq jasaý týraly sheshim - Prezıdenttiń óziniń konstıtýtsııalyq quqyǵyn iske asyrýymen qatar, adamgershilik jáne otandastaryna degen senimi dep bilemin. Biz óz halqymyzǵa senýimiz kerek», - deıdi ol.