Biz otanshyl bolýǵa, jas urpaqtyń sanasyna otanshyldyq uǵymyn berik ornyqtyrýǵa tıispiz - Elbasy
ASTANA. Qazannyń 20-sy. QazAqparat /Marlan Jıembaı/ - Biz otanshyl bolýǵa, jas urpaqtyń sanasyna otanshyldyq uǵymyn berik ornyqtyrýǵa tıispiz. Bul pikirdi QR Prezıdenti N.Nazarbaev búgin Astanada ótip jatqan Qazaqstan halqy Assambleıasynyń HÚІ sessııasynda bildirdi.
«Bizdiń barshamyzdyń Otanymyz bir. Ol - táýelsiz Qazaqstan! Ol bizdiń eń qymbat, eń asyl qundylyǵymyz! Otany joq adam - tamyrsyz, turlaýsyz qańbaq sııaqty. «Otan - ottan ystyq» degen, týǵan jerdiń topyraǵy da, taýy men dalasy da qymbat. Otannyń aptap ystyǵy men aıazdy sýyǵy da janǵa jaıly. Onyń kóneden jetken tereń tarıhy men abyz tili túsingen janǵa syrly shejire shertedi. Otandy qasterleý - eldigimizdiń tiregi. Biz otanshyl bolýǵa, jas urpaqtyń sanasyna otanshyldyq uǵymyn berik ornyqtyrýǵa tıispiz. Bile-bilsek, Otandy súıý - bizdiń perzenttik paryzymyz, qarys qadam úshin janyn qıǵan babalardyń asyl amanatyna adaldyǵymyz!», - dedi Elbasy.
Sonymen qatar aldymyzda áli talaı asqar taýlardyń, almaǵaıyp zamanyna saı qubylyp turǵan ǵalamnyń bar ekendigine ári onyń bárine tótep berip, ortaq Otanymyzdy kózimizdiń qarashyǵyndaı saqtaýǵa tıistigimizdi basa aıtqan N.Nazarbaev «Ol úshin bizge eń áýeli yntymaq pen bereke-birlik kerek. Endeshe, táýelsizdigimiz tuǵyrly, elimiz aman, máńgi, bereke-birligimiz baıandy bolsyn, aǵaıyn!», dep túıindedi sózin.
