Biz Ortalyq Azııada bolyp jatqan ekonomıkalyq, saıası, áleýmettik jaǵdaılardy bilgenimiz jón - saıasattanýshy E. Qarın
ALMATY. 23 qarasha. QazAqparat /Ádilet Musahaev/- Sońǵy jyldary biz japontanýshylar, parsytanýshylar, shyǵystanýshylar jáne aǵylshyn, frantsýz tilindegi mamandardy halyqaralyq saıasat máseleleri boıynsha daıyndap jatyrmyz.
Al Ortalyq Azııa elderine qyzyǵýshylyq tanytatyn mamandar shyn mánisinde joqtyń qasy, máselen ózbektanýshylar, qyrǵyztanýshylar joq. Bul jaıynda saıasattanýshy Erlan Qarın Almatyda ótip jatqan І ortalyqazııalyq Konvent barysynda aıtty.
Onyń aıtýynsha, biz Ortalyq Azııada ornalasqandyqtan, osy aımaqta bolyp jatqan ekonomıkalyq, saıası, áleýmettik jaǵdaılardy bilgenimiz jón. "Sondyqtan, elimiz osy aımaqta jyldan-jylǵa joǵary ról atqarýǵa umtylýda, soǵan oraı onyń áleýeti, ishki sarapshy deńgeıi de sáıkes bolý kerek. Biz Reseı Memlekettik Dýmasy lıderleriniń aty-jónine deıin jatqa bilgenmen, Qyrǵyzstannyń Jogorgý Keneshindegi 5 partııanyń fraktsııa jetekshilerin bile bermeımiz", - deıdi E.Qarın.
Sonymen qatar, ol Ortalyq Azııa Odaǵynyń qurylýyna basty kedergi bolyp jatqan saıası júıelerdiń ártúrliligine toqtalyp ótti. "20 jyl buryn 5 respýblıka bir ýaqytta táýelsizdik alyp, derbes memleket bolsa da olar túrli saıası, ekonomıkalyq júıeni qalyptastyrdy. Sondyqtan Ortalyq Azııa Odaǵynyń qurylýyna basty kedergilerdiń biri - bul ártúrli saıası qarama-qaıshylyqtardyń bolýy. Mysaly, Tájikstan men Ózbekstan arasyndaǵy sý elektr stansysy boıynsha daý nemese shekara daýlary bar. Sondyqtan eń birinshi kedergi bolyp jatqan saıası qarama-qaıshylyqtar der edim", -deıdi saıasattanýshy.
Erlan Qarın sondaı-aq Oratalyq Azııa Odaǵynyń qurylýy kúmándi ekendigin, degenmen ony qurý jóninde jumys jasaýymyz kerektigin aıtyp ótti. "Eger aımaq retinde tutastana alsaq, ǵalamdyq úrdiste belgili bir orynǵa ıe bolamyz. Qazaqstannyń 16 mln. halqy bar, bul óndiriske azdyq etedi. Eger Ortalyq Azııa memleketteri birigip jatsa 65 mıllıonǵa jýyq adamdy quraıtyn keńistik bolady ", -deıdi E.Qarın.
