Biz oqýshynyń aldynda jaýaptymyz - Kúlásh Shámshıdınova
SEMEI. QazAqparat - QR bilim jáne ǵylym mınıstri Kúlásh Shámshıdınova Shyǵys Qazaqstan oblysyna jumys sapary barysynda Shákárim atyndaǵy úsh tilde oqytatyn №5 kópbeıindi gımnazııasyna, Semeı qalasyndaǵy №49 orta mektepke, sondaı-aq, atalmysh mektep ishinen ashylǵan «Pedogogıkalyq - psıhologııalyq túzetý» kabınetinde boldy, dep habarlaıdy QazAqparat Semeı qalalyq bilim bólimine silteme jasap.
Kezdesý barysynda mınıstr Shákárim atyndaǵy úsh tilde oqytatyn №5 kópbeıindi gımnazııasynynyń kópjyldyq tarıhyna qaramastan, jańa zaman talabyna saı ekenin atap ótti. Mektep NZM standarttaryna saı jańa tehnologııalarmen jabdyqtalǵan.
Sondaı-aq, Kúlásh Shámshıdınova «Dara» qorynyń kómegimen ashylǵan, búgingi kúni 400-den astam balany qamtyp otyrǵan «Pedogogıkalyq - psıhologııalyq túzetý» kabınetine bardy. Munda ár balaǵa tıisti jaǵdaı jasalǵan. Mınıstr mektep ishinen ashylǵan kabınet jaıly:
«Korektsııalyq kabınet jaıynda birneshe ret estigenmin, búgin oıymdaǵyny kórgendeı boldym. Bul - erekshe balalardy áleýmettik beıimdeý, ońaltý jáne erekshe kútimdi qajet etetin balalardyń ata-anasyna keńes berý, kómektesý qyzmetin kórsetetin birden-bir oryn», - dedi.
Kúlásh Noǵataıqyzy pedogogıkalyq ujymmen kezdesip, ustazdardy tolǵandyryp júrgen suraqtarǵa jaýap berdi. Mınıstrge kitaphanashylar men ádiskerlerdiń eńbekaqysy, krıterıaldy baǵalaý, bilim berýde shet tilderdiń engizilý júıesi týraly suraqtar qoıyldy.
Ult kóshbasshysynyń jalaqysy tómen jumysshylardyń eńbekaqysyn kóterý bastamasy muǵalimderge de qatysty.
«Eń birinshi kezektegi másele - tabysy tómen jumysshylardyń eńbekaqysyn 30%-ǵa kóterý. Qazir QR Eńbek jáne halyqty áleýmettik qorǵaý mınıstrliginde esep júrgizilip jatyr. Daıyn bolǵanda habarlaımyz», - dedi mınıstr.
Mınıstr óz sózinde mektepterdiń jańa baǵdarlamaǵa kóshý sebepterine basa nazar aýdardy.
«Budan ary da ózgerister bolady, jumys jasalady. Sebebi, biz aldymyzda otyrǵan oqýshylardyń, olardyń ata-anasy men memleket aldynda jaýaptymyz. Búginde zaman talabyna saı eńbek narqy ózgerip jatyr. Sondyqtan básekege qabiletti tulǵa tárbıeleý óte mańyzdy. Balalarǵa oılanýdy, oıyn jetkizýdi úıretýimiz kerek», - dedi Kúlásh Shámshıdınova.
