Biz, ókinishke qaraı, qazaqstandyq dostarymyzdan azdap qalyp qoıdyq - Vladımır Pýtın
MÁSKEÝ. QazAqparat – Reseı prezıdenti Vladımır Pýtın Reseıdiń Qytaımen, postkeńestik memlekettermen ekonomıkalyq baılanysyn keńeıtýge múmkindik beretin ınfraqurylym jetkiliksiz ekenin moıyndady. Memleket basshysy osy máseleni sheshý qajet ekenin atap ótti, dep habarlaıdy QazAqparat TASS agenttigine silteme jasap.
Jyl saıynǵy úlken baspasóz konferentsııasynda Pýtınge Samara oblysyndaǵy Edil ózenine salynyp jatqan kópir týraly suraq qoıyldy.
«Bul joba memleketaralyq yntymaqtastyqty nyǵaıtýda mańyzdy ról atqarady, óıtkeni Qytaımen aradaǵy taýar aınalymy ósip jatqanyna qaramastan, bizdiń Keńes odaǵyndaǵy burynǵy týysqan memlekettermen, qazirgi táýelsiz eldermen aradaǵy taýar aınalymy óte úlken ekenine qaramastan, ınfraqurylym jetkilikti damymaı otyrǵany anyq», - dedi RF prezıdenti.
«Biz ókinishke qaraı, bul jaǵynan qazaqstandyq dostarymyzdan kishkene qalyp qoıdyq. Olar Qytaıǵa aparatyn joldyń ózderine tıesili bóligin salyp bitirdi, biz jol salý jumysyn qolǵa alýǵa tıispiz», - dep atap ótti memleket basshysy.
Ol bul jumystyń mindetti túrde iske asatynyna sendirdi.
