Biz naryqty jańa jınalǵan sapaly jáne arzan kókenistermen qamtamasyz etemiz - «Green Land Alatau» JShS-niń dırektory
ALMATY. 23 tamyz. QazAqparat - Bizdiń alǵashqy ónimimiz Almaty óńirinde saýda sóresine kúzdiń orta sheninen bastap shyǵa bastaıdy.
Bul týraly Almaty oblysy Іle aýdanyndaǵy Qazaqstandaǵy eń iri jylyjaı sanalatyn «Green Land Alatau» JShS-niń dırektory Almas Dáýitov jýrnalısterdi óndiris ornymen tanystyrý kezinde aıtty.
«Bizdiń ónimderimiz óńdeýge emes, birden tutynýǵa arnalǵan. Ásirese, qysqy kezeńde. Óıtkeni bul kezeńde ımporttyq kókónis ónimderiniń baǵasy naryqta óte joǵary bolady. Sondyqtan bul jylyjaı keshenin qurýdaǵy basty maqsatymyz - naryqtaǵy ahýaldy turaqtandyryp, baǵany arzandatý. Tutynýshylar bizdi kópten beri kútýde. Almatydaǵy barlyq iri saýda oryndarymen kelissóz júrgizdik. Qazirgi tańda naryq pen bólshek jáne kóterme tutynýshylar mundaı óndiristerge muqtaj», - deıdi A. Dáýitov.
Onyń aıtýynsha, kókónisti óndiristik jolmen ósiretin jylyjaı kepildendirilgen sapamen jáne jas ónimmen qamtamasyz etedi. Qazir Qytaı men Ózbekstannan tasymaldanatyn kókónis saýda sóresine jetkenge deıin uzaq jol júredi. Al bul jylyjaıda óndirilgen qyzanaq, qııar men salat jasaýǵa qajetti ózge de kókónister ımporttyq ónimderden aıtarlyqtaı arzan bolmaq. Degenmen onyń qandaı kólemde bolatynyn josparlaý múmkin emes. Naryqtaǵy ahýal jaǵdaıatyn aldyn-ala boljaý qıyn.
