Biz muqtajdyq pen masyldyqty ajyrata bilýimiz kerek - Berdibek Saparbaev

NUR-SULTAN. QazAqparat - Qazaqstandaǵy ár otbasynda bolatyn áleýmettik kartany ázirleý jumystary 1 shildege deıin aıaqtalady. Bul týraly Úkimettiń baspasóz ortalyǵynda Eńbek jáne halyqtyń áleýmettik qorǵaý mınıstri Berdibek Saparbaev málim etti, dep habarlaıdy QazAqparat tilshisi.

Memlekettik baǵdarlamalar aıasynda halyqqa kórsetiletin áleýmettik kómek-qoldaýlar týraly aıta kele Berdibek Saparbaev bir máseleni erekshe atap ótti.

«Ózderińiz biletindeı, balalaryna mektepke barǵanda tegin tamaq berý, balabaqshaǵa ornalastyrý, lagerge tegin aparý, kıim nemese oqýlyq alyp berý sekildi jumystardy ata-analar aıtyp jatady. Bul jumysty jergilikti bılik ókilderimen ary qaraı jalǵastyratyn bolamyz. Mınıstrlik aı saıyn bárin qarap otyrady. Jańa Gúlshara Naýshaqyzy (Úkimet basshysynyń orynbasary) Elbasynyń bergen tapsyrmasyn aıtty. Bul jerde bir nárse bar: Biz muqtajdyq pen masyldyqty ajyrata bilýimiz kerek. Sondyqtan, jergilikti bılik ókilderimen birigip, ár otbasynyń áleýmettik kartasyn jasap jatyrmyz. Osy 1 shildege deıin ol daıyndalady. Sodan keıin qosymsha kómekter kórsetiletin bolady», - deıdi Berdibek Saparbaev.

Aıta ketsek, Úkimettiń baspasóz ortalyǵynda 160 myń otbasyǵa ataýly áleýmettik kómek taǵaıyndalǵanyn málim etken bolatyn. Onyń aıtýynsha, ol shamamen - 806 myńdaı halyq. Berilgen talaptarǵa saı kelmegendikten, 10 myń otbasyǵa AÁK taǵaıyndalmaǵan.

Atalmysh jıynda Elbasynyń «Áleýmettik qamqorlyq» jańa áleýmettik sharalarynyń negizgi baǵyttaryn túsindirý boıynsha óńirlerge jasaǵan jumys saparlary qorytyndylanyp jatyr.