Biz medıalyq kompanııalar menedjerleriniń psıhologııasyn ózgerttik - «Arna Medıa» basshysy E.Baıjanov
p; Qazannyń 23-i. QazAqparat /Aıgúl Turysbekova/ - «Arna Medıa» Ulttyq aqparattyq holdıngi medıalyq kompanııalar menedjerleriniń psıhologııasyn ózgertti. Endi olar tek memlekettik tapsyrysty oryndaýǵa ǵana emes, eń aldymen qarqyndy damýǵa, onyń ishinde ekonomıkalyq damýǵa bet buryp otyr.
Bul týraly beısenbi kúni Almatyda ulttyq aqparattyq holdıngtiń alǵashqy jumys qorytyndysyna arnalǵan brıfıngte «Arna Medıa» aktsıonerlik qoǵamynyń basqarma tóraǵasy Erlan Baıjanov málim etti. E.Baıjanov óz sózinde, «Arna Medıa» qurylǵan bir jyldyń ishinde holdıngtiń barlyq uıymdaryna korporatıvtik basqarýdyń halyqaralyq standarttary engizilgenin aıtyp ótti. «Dıý dılıdjens» amaly bastaldy, onyń qorytyndysy boıynsha «Arna medıa» kompanııalarynyń naryqtyq qunynyń obektıvti baǵasy alynatyn bolady», -dedi holdıng basqarmasynyń tóraǵasy.
Onyń aıtýynsha, holdıng buqaralyq aqparat quraldarynyń kontentin jaqsartý jumystaryn turaqty ótkizip keledi. Jarnamalar satylymy endi birtutas seıl-haýsqa shoǵyrlanǵan. Bul tek basqarý tıimdiligin arttyrýǵa ǵana emes, sonymen birge otandyq aqparattyq naryqtaǵy «Arna Medıa» kompanııalary tobynyń úlesin arttyrýǵa da baǵyttalyp otyr.
Brıfıngke «Qazaqstan» RTRK aktsıonerlik qoǵamynyń basqarma tóraǵasy Janaı Omarov, «Habar agenttigi» aktsıonerlik qoǵamynyń basqarma tóraıymy Gúlnár Yqsanova, «Kazahstanskaıa pravda» respýblıkalyq gazeti» aktsıonerlik qoǵamynyń basqarma tóraǵasy Aleksandr Tarakov, «QazAqparat» Ulttyq kompanııasy aktsıonerlik qoǵamynyń basqarma tóraǵasy Dáýren Dııarov, «Egemen Qazaqstan» respýblıkalyq gazeti» aktsıonerlik qoǵamynyń basqarma tóraǵasy Erkin Qydyr qatysty.
D.Dııarov óz sózinde atap kórsetkendeı, búginde ınternet-resýrstar telearnalarmen tikeleı básekelesýge qabiletti. «QazAqparat» - kez kelgen jobany júzege asyra alatyn veb-portal. «Aqparattyq agenttik retinde biz onlaın rejiminde aqparat taratamyz jáne shekaramen nemese tırajben shektelmeımiz», dedi ol. D.Dııarovtyń aıtýynsha, agenttiktiń saıty eń aldymen qazaqstandyq oqyrmandardyń nazaryn kóbirek aýdarady, ekinshi orynda - AQSh oqyrmandary, al odan keıin Reseı jáne basqa elder keledi. «Muny elimizdiń Eýropadaǵy qaýipsizdik jáne yntymaqtastyq uıymyna tóraǵalyǵy qarsańynda halyqaralyq qoǵamdastyq tarapynan Qazaqstanǵa degen yqylastyń artyp otyrǵanymen túsindirýge bolady», dep atap kórsetti «QazAqparat» Ulttyq kompanııasy» AQ basqarma tóraǵasy.
«Arna Medıa» Ulttyq aqparattyq holdıngi Qazaqstannyń aqparattyq keńistiginiń básekege qabilettigin arttyrý maqsatynda memlekettik medıa-resýrstardy tıimdi basqarý úshin 2008 jyly shildeniń 3-de quryldy. Onyń quramyna - «Qazaqstan telekommýnıkatsııalary» (KATELKO) AQ, «Qazteleradıo» AQ, «Habar» agenttigi, «Qazaqstan» RTRK, «Egemen Qazaqstan» jáne «Kazahstanskaıa pravda» respýblıkalyq gazetteri, «QazAqparat» ulttyq kompanııasy, «Jas órken» JShS, «Qazaq gazetteri» JShS kiredi.
