Biz kópti kórgen el aǵalarynyń aqyl-keńesine júginemiz - Prezıdent
ULYTAÝ. QazAqparat – Quryltaıǵa barlyq oblystyń, san túrli salanyń, ár býynnyń ókilderi qatysyp otyr. Bul týraly Ulytaý oblysynda ótip jatqan Ulttyq quryltaıdyń otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.
«Oblystyń alǵashqy qadamy alqaly jıynnan bastalýda. Ult uıasy Ulytaýdyń ǵasyrlar boıǵy uly mıssııasy qaıta jalǵasyn tapty. Endi, Ulttyq quryltaıdyń jumysyn uıymdastyrý máselesine toqtalsam. Onyń quramynda 117 adam bar. Quryltaıǵa barlyq oblystyń, san túrli salanyń, ár býynnyń ókilderi qatysyp otyr. Biz kópti kórgen el aǵalarynyń aqyl-keńesine júginemiz. Belsendi azamattyq ustanymy bar orta býynnyń tájirıbesin eskeremiz. Jańasha oılatyn jastardyń tyń ıdeıalaryn qoldaımyz», - dedi Qasym-Jomart Toqaev.
Osy oraıda Prezıdent quryltaıǵa Parlament depýtattary, saıası partııalar men Qazaqstan halqy Assambleıasynyń músheleri de shaqyrylǵanyn eske saldy.
Aıta keteıik, Prezıdent Ulytaý oblysyndaǵy jumys sapary aıasynda Ulttyq quryltaıdyń alǵashqy otyrysyna qatysyp jatyr.
Keshe Memleket basshysynyń Ulttyq quryltaı qurý týraly Jarlyǵy jarııalandy.
Ulttyq quryltaıdyń qazirgi quramynda Májilis depýtattary men QHA múshelerinen, azamattyq qoǵam men saıası partııa ókilderinen, sarapshylar men óńirlerdegi qoǵamdyq keńes múshelerinen, kásipkerlerden jasaqtalǵan 117 adam bar.
Solardyń bir parasyn atasaq, aqyn Muhtar Shahanov, qazaqtyń tuńǵysh ǵaryshkeri Toqtar Áýbákirov, akademık Asqar Jumadildaev, ekonomıst Jaqsybek Kúlekeev, saıasatker Álıhan Báımenov, jýrnalıst, medıa-menedjer, qoǵam qaıratkeri Ermurat Bápı, Parlamenttiń birneshe shaqyrylymynyń depýtaty Nurtaı Sabılıanov, balýan Dáýlet Turlyhanov, ǵalym-bıotehnolog Kúnsulý Zakarııa, dintanýshy Qaırat Joldybaı, ǵalym Anar Fazyljanova sııaqty esimder bar.
Memlekettik keńesshi Erlan Qarınniń jazbasyna súıensek, keleshekte quryltaı jumysyna qatysýshylar aýystyrylyp otyrýy múmkin.
