Biz kóp ultty qazaqstandyq qoǵamnyń birligi men kelisimin kózdiń qarashyǵyndaı saqtaýǵa tıispiz -Elbasy
ASTANA. 3 naýryz. QazAqparat - Biz kóp ultty qazaqstandyq qoǵamnyń birligi men kelisimin kózdiń qarashyǵyndaı saqtaýǵa tıispiz.
Búgin "Nur Otan" HDP ortalyq apparatynyń ǵımaratynda Respýblıkalyq saılaýaldy qoǵamdyq shtabtyń múshelerimen kezdesýinde Memleket basshysy Nursultan Nazarbaev osylaı málimdedi.
QR Prezıdenti baspasóz qyzmetiniń málimetinshe, Nursultan Nazarbaev qazaqstandyq qoǵamnyń birligin saqtaý óte mańyzdy ekenine erekshe nazar aýdardy. Qazaqstanda áleýmettik máselelerdi sheshý jáne ál-aýqatty arttyrý memlekettik saıasattyń basty basymdyǵy bolǵan jáne solaı bolyp qala beredi.
«Biz kóp ultty qazaqstandyq qoǵamnyń birligi men kelisimin kózdiń qarashyǵyndaı saqtaýǵa tıispiz. Bul basty jetistigimiz, elimiz damýynyń sharty. Táýelsizdiktiń 20 jyly ishinde osylaı boldy, bolashaqta da solaı bola beredi. Men bul týraly qaıtalaýdan eshqashan sharshaǵan emespin, sondyqtan bul bizdiń memleketimiz úshin óte mańyzdy másele. Ózderińiz bilesizder, bıylǵy jyly biz Qazaqstan halqynyń birligi kúni - 1 mamyrdy jańa formatta atap ótemiz. Buǵan erekshe kóńil bólý kerek», - dep atap ótti Prezıdent.
