«Biz Kók týly memleketpiz be, álde kóp týly memleketpiz be?» - respýblıkalyq basylymdarǵa sholý

***

«Óskemen Óskemen bolǵaly mundaı halyqaralyq iri forýmdy ekinshi márte ótkizip otyr. Budan úsh jyl buryn halyqaralyq ınvestıtsııalyq forým ótip, onyń jumysyna sheteldik iri kompanııalar, kórshi memleketterdiń ókilderi qatysyp, kólik ınfraqurylymyn damytý jóninde ózekti máselelerdi talqylaǵan. Onyń jumysyna Qazaqstan Respýblıkasynyń Prezıdenti N.Nazarbaev qatysyp, elimizde atalmysh salanyń órkendeýine eleýli úles qosqan. Al bul jolǵy forýmnyń alatyn orny men salmaǵy basym bolmasa kem emes. Ejelden dostyǵy men tatýlyǵy jarasqan qos memlekettiń basshylary N.Nazarbaev pen D.Medvedev qatysatyn forýmda qazirgi tańdaǵy basty mindetterdiń biri - ónerkásipti, ınvestıtsııa men ınnovatsııany alǵa qaraı bastyrý joldaryn qarastyrý, agroónerkásip kesheni men týrızmdi damytý, basqa da mańyzdy salalardyń Qazaqstan men Reseıde órken jaıý máselelerin keńinen talqylaý jáne birlesken memorandýmdarǵa qol qoıý máseleleri qarastyrylǵan. Qazaqstan men Reseı arasyndaǵy VІІ óńiraralyq yntymaqtastyq forýmyna Reseıdiń barlyq ólkelerinen jáne elimizden 800-den astam adam qatysyp, mańyzdy máseleler boıynsha kelisimderge qol qoımaq», dep jazady «Egemen Qazaqstan» gazeti. Búgin óz jalǵasyn tabatyn forým jaıynda basylymnyń seısenbilik nómirinde jaryq kórgen «Shyraıly shyǵysta oń ózgerister kóp» degen maqaladan egjeı-tegjeıli oqyp bile alasyzdar.

Sonymen qatar búgin jaryq kórgen «Aıqyn», «Alash aınasy», «Kazahstanskaıa pravda» syndy birqatar respýblıkalyq basylymdarda da forým jumysy jan-jaqty baıandalǵan.

Keshe EQYU-nyń Іs basyndaǵy tóraǵasy, Qazaqstan Respýblıkasynyń Memlekettik hatshysy - Syrtqy ister mınıstri Qanat Saýdabaev málimdeme jasady. Málimdeme mátini «Egemen Qazaqstan» gazetiniń búgingi nómirinde jarııalanyp otyr. "EQYU-nyń Іs basyndaǵy tóraǵasy Taýly Qarabaq janjaldy aımaǵyndaǵy Túıisý jelisi boıynda oq atýdy toqtatý rejiminiń sońǵy kezderi buzylýy jıilep ketýin sheshimdi túrde aıyptaıdy. Eki jaqtan da adam óliminiń ósýi aıtarlyqtaı dabyl qaqtyrady", delingen málimdemede.

EQYU-nyń Іs basyndaǵy tóraǵasy sondaı-aq óziniń málimdemesinde oq atpaý rejimin buzýdyń kez kelgen kórinisi Mınsk konferentsııasy aıasynda júrgizilip jatqan kelissóz úderisterin turaqsyzdandyryp, konstrýktıvti únqatysýdy belsendi etý jolyndaǵy múmkindikterdi shekteıtinin atap kórsetedi. Osyǵan baılanysty ol 2010 jyldyń 6 qyrkúıeginde janjaldasýshy taraptardy sabyrlylyq kórsetip, oq atýdy toqtatý týraly ýaǵdalastyqtardy qatań saqtaýǵa jáne ózara aıyptaýlarǵa qurylǵan málimdemeler jasaýdan tartynýǵa shaqyrǵan Mınsk toby teń tóraǵalaryn qoldaıdy.

Qazir ǵalamtordaǵy Baqyt Sársekbaevtyń Beıjiń olımpıadasynan keıin Almaty qalasy ákimdigi syıǵa tartqan páteriniń daýy jaıly jazǵan ótinishi keńinen talqyǵa túsip jatyr. Osyǵan oraı «Egemen Qazaqstan» gazetinde «Kontador keledi, al Sársekbaev máńgilik» degen taqyryppen kólemdi maqala jarııalandy. onda bizdiń sportshymyzdyń 5 mıllıon dollardy qaltasyna basyp, jel aıdaǵan ebelekteı qaı jerde paıda kóbirek, soǵan júre beretin shabandoz Alberto Kontador emes ekendigi basa aıtylǵan. «Baqyt Sársekbaev - qazaq sportynyń bir shyńy. órmelep jylan shyǵatyn emes, qyrannyń qanaty talyp ázer jetetin shyńy. Et qyzýymen elpildep páter kiltin usynǵan ákimder de qatesin túzer. Syılyq aıtylǵan soń, berilýi kerek. biraq, batyrymyzdyń baǵasyn jeńildetpeıikshi...», dep jazady basylym.

***

«Memlekettik rámizder týraly zańnyń» 13-shi babynyń 1-shi tarmaqshasyna sáıkes, Qazaqstan Respýblıkasynyń azamattary, sondaı-aq respýblıka aýmaǵynda júrgen adamdar Qazaqstan Respýblıkasynyń memlekettik rámizderin qurmetteýge mindetti. Biraq, ókinishke qaraı, sońǵy jyldary, ásirese, Almaty kóshelerinde qazaqtyń Kók týyn emes, Shyńjań Uıǵyr avtonomııalyq aýdanynyń beıresmı rámizine aınalǵan, jarty aı men juldyz bezendirilgen kógildir týdy avtokólikteriniń aldyńǵy jáne artqy terezelerine ilip júrý úrdisi beleń alyp barady. Bul jaıynda «Aıqyn» gazetiniń seısenbilik nómirinde jarııalanǵan «Biz Kók týly memleketpiz be, álde kóp týly memleketpiz be?» degen maqalada keńinen baıandalǵan. «Tipti qalanyń iri saýda ortalyqtarynda aıtýly tý bezendirilgen kólikke arnalǵan aýa tazartqysh zattary da satylyp keledi. Baǵasy da Qazaqstannyń Kók baıraǵy bezendirilgen aýa tazartqyshtarynan 110 teńgege arzan. Bul máselege alańdaýly el azamattary munyń ıdeologııalyq aspektisinen bólek, baǵa saıasatynyń ózinde astar jatqan joq pa degen saýaldy tótesinen qoıady», dep jazady basylym. Sonymen qatar kóterilgen máselege oraı birqatar azamattardyń pikirleri de qosa jarııalanǵan.

Osy basylymnyń dástúrge aınalǵan «Aq sóıle!» aıdarynyń búgingi qonaǵy - ekonomıka ǵylymdarynyń doktory, akademık, ál-Farabı atyndaǵy QazUÝ professory Saǵyndyq Satybaldınmen aradaǵy suhbat «Elbasymyzdyń adamzat kóshin ilgeri jyljytýshy usynystary qozǵaýshy kúshke aınalady» degen taqyryppen jarııalandy. Ekeýara áńgime barysynda basylym tilshisiniń barlyq saýaldaryna egjeı-tegjeıli jaýap bergen akademık «Qalaı bolǵanda da ár memlekettiń ulttyq valıýtalary, al Eýroaımaqta evro saqtalady. Eýro ishki rynokty qamtamasyz etetin, sondaı-aq CDR qorjynyndaǵy valıýta. Al dollar massasy túgeldeı derlik elektrondy esep aıyrysý júıesinde qazirgi ekvıvalenti kúıinde kórinis tabady. Sonda álemdegi barlyq dollar tek qana elektrondyq aqsha bolyp, banknottar joıylady. Elektrondyq halyqaralyq valıýta baǵamy árbir memlekettiń ulttyq valıýtasyna sol elderdiń ortalyq nemese ulttyq bankteri belgileıtin shendestirý koeffıtsentimen baılanystyrylady. Memleketter nemese kompanııalar, sondaı-aq jeke tulǵalar halyqaralyq deńgeı-de esep aıyrysý kezinde, bar bolǵany elektrondy kartochkany paıdalanady», degen pikirin alǵa tartady.

***

«Astyq eksportynan asyǵymyz alshy túser me eken?». Osy taqyryppen «Alash aınasy» gazetiniń búgingi nómirinde jaryq kórgen maqalada azyq-túlik qaýipsizdigi máselesi keńinen qozǵalǵan. «Parlament sessııasynyń ashylýynda Elbasy Úkimetke ishki naryqtaǵy nan men un baǵasynyń turaqtylyǵyn saqtaýdy tapsyrǵan edi. Osy mindetti júzege asyrý maqsatynda aýyl sharýashylyǵy mınıstrligi jaqynda óńirlerdi aralap, astyqty aımaqtyq ahýalyn bilip qaıtty. Nátıjesinde, ishki turaqtylyqty bekemdeı túsý nıetimen mınıstrliktiń barlyq oblystarmen jáne Almaty, Astana qalalarymen arada astyqpen qamtamasyz etý týraly memorandýmyna qol qoıyldy. Eldiń nesibesine bitken egindi ysyrapsyz paıdalaný endi osy pátýa aıasynda júzege aspaq», dep jazady basylym.

Jaz mezgili bastalysymen-aq barlyq saýda oryndarynda, kóshe boıynda jemis-jıdek, qaýyn-qarbyz, baqsha ónimderiniń saýdasy qyzady. Sonymen qatar balalardyń ish aýrýy da órshı túsetindigi shyndyq. Osy máselege qatysty jaıttar «Alash aınasy» gazetiniń búgingi sanyndaǵy «Ózbek qarbyzyn jep, ókinip qalmańyz!» degen maqalada keńinen aıtylǵan. Basylymnyń atap ótýinshe, tamyz aıynda Ońtústik Qazaqstan oblysynda jeti birdeı búldirshin juqpaly ishek aýrýynan shetinepti. Al tamyz aıyna deıin dál osy aýrý túrinen 2 sábı shetinegen eken. «Mamandar balalar óliminiń naqty sebebin anyqtaýǵa kirisip ketti. Olardyń kúdigi ala jazdaı saýdasy qyzatyn ala qarbyz ben sary qaýynǵa túsip otyr», dep jazady basylym.

Osy basylymnyń turaqty «Dat!» aıdarynda S.Toraıǵyrov atyndaǵy Pavlodar memlekettik ýnıversıtetiniń rektory Erlan Arymen aradaǵy suhbat «Sezim arqyly namys týady» degen taqyryppen berilgen. Ekeýara áńgimeniń baıybyna barǵyńyz kelse, basylymnyń búgingi nómirin jiberip almańyz.

***

«Kazahstanskaıa pravda» gazetiniń jazýynsha, keshe Úkimet úıinde Qazaqstan Respýblıkasynyń Premer-Mınıstri Kárim Másimov QR Úkimeti janyndaǵy Ekonomıkalyq keńesshiler keńesiniń kezekti otyrysyn ótkizdi. Keńes otyrysynda professor, ekonomıka ǵylymdarynyń doktory Arystan Esentúgelovtiń «Qazaqstandyq ekonomıkany daǵdarystan keıin jetildirý startegııasy» taqyrybyndaǵy baıandamasy tyńdalyp, talqyǵa salyndy. Baıandamada el ekonomıkasynyń qazirgi jaǵdaıyna baǵa berilip, el ekonomıkasyn úlgilendirý jáne onyń básekege qabilettiligin arttyrýǵa qajetti sharalar boıynsha usynystar berilgen. Baıandamany talqylaýǵa QR Bilim jáne ǵylym mınıstrligi Ekonomıka ınstıtýtynyń dırektory Orazaly Sábden, Qoǵamdyq problemalardy saraptaý ortalyǵynyń dırektory Merýert Mahmutova, «Turan» ýnıversıtetiniń rektory, ekonomıka ǵylymdarynyń doktory Rahman Alshanov, Ekonomıkalyq jáne qarjylyq tolqýlardy erterek anyqtaý ortalyǵynyń dırektory Sara Alpysbaeva jáne Qazaqstan-brıtan Tehnıkalyq ýnıversıtetiniń ekonomıka kafedrasynyń meńgerýshisi Nurlan Nurseıit pen ózge de bilikti mamandar qatysty.