Biz Qazaqstannyń EQYU-nyń basqarý isin sátimen júzege asyratynyna senemiz - Eýropalyq Keńestiń Parlamenttik Assambleıasy
ANA. Qarashanyń 4-i. QazAqparat /Aıdar Ospanalıev/ - Búgin Parlament Senaty tóraǵasynyń orynbasary Aleksandr Sýdın Eýropalyq Keńestiń Parlamenttik Assambleıasynyń vıtse-prezıdenti Mevlıýt Chavoshoglýmen kezdesti,
dep habarlaıdy QazAqparat.
Júzdesýde taraptar Qazaqstannyń álemdegi búgingi orny men onyń tarıhyna qatysty keń aýqymdy máseleler jóninde ózara pikir almasty.
Senat tóraǵasy orynbasarynyń sózine qaraǵanda, Qazaqstan men Eýropalyq Keńestiń Parlamenttik Assambleıasy arasynda arnaıy kelisimge qol qoıylǵannan beri taraptar arasyndaǵy baılanys senim men ózara túsinistik negizinde damyp keledi. «Biz Assambleıany eýropalyq keńistiktegi mańyzdy áriptesterdiń biri dep qabyldaımyz. Osyǵan qaraı bizdiń Parlamenttiń depýtattary onyń sessııalary men ózge de jıyndaryna belsendi atsalysyp keledi. Biz sizderdiń elimizge kelýdegi maqsattaryńyzdy jaqsy túsinemiz. Jalpy, bul másele, ıaǵnı 1932-1933 jyldardaǵy asharshylyq Keńes Odaǵynyń quramynda bolǵan barlyq elderge qaıǵy men qasiret ákeldi. Onyń eń kóp zardabyn ásirese Qazaqstan halqy kórdi. Óıtkeni biz úshin ol myńdaǵan adamdardyń ólimimen baılanysty úlken zobalań boldy. Árıne, bul zulmattyń sebepterin saralaıtyn bolsaq, olar óte kóp jáne ol júıeli. Bul durys júrgizilmegen ujymdastyrý. Bul qazaqtardy olardyń basty azyq-túlik kózi bolyp tabylatyn malynan aıyrý sııaqty sharalar. Osyndaı áreketterdiń saldarynan elimizde tarıhshylardyń málimetterinshe 2 mıllıonǵa jýyq adam qyryldy.
1 mıllıon adam ózge elderge ketýge májbúr boldy. Qazaqstanda osy kezeńde 40 mıllıon bas mal bolǵan. Ol 3 jyldyń ózinde 10 esege azaıyp ketti. Al qazaqtardyń sany 40 paıyzǵa kemidi. Biz eldi osyndaı jaǵdaıǵa jetkizgen bıliktiń saıasatyn qatty aıyptaımyz», dedi depýtat.
Kezdesýde Mevlıýt Chavoshoglý Qazaqstannyń Eýropamen yqpaldasý baǵytyndaǵy bastamalaryn tolyq qoldaıtyndyǵyn bildirdi. «Sondaı-aq biz Qazaqstannyń halyqaralyq baǵytta atqaryp jatqan sharalaryn da qoldaımyz jáne sizder Eýropadaǵy qaýipsizdik jáne yntymaqtastyq uıymyn basqarý isin sátimen júzege asyrady degen senimdemiz. Men kez-kelgen kezdesýde bolsyn, kez-kelgen sharada Qazaqstannyń tózimdilik pen ultaralyq jáne konfessııaaralyq kelisimdi nyǵaıtýdaǵy atqaryp jatqan isterin úlgi etip júremin», dedi mártebeli meıman.
