«Biz Qazaqstanǵa ınvestıtsııalaımyz!» beınerolıgin álem boıynsha 350 mln.-nan astam adam tamashalaıdy
ASTANA. 18 qazan. QazAqparat - CNN, Euronews jáne Bloomberg halyqaralyq arnalarynda tanymal rejısser Tımýr Bekmambetovtyń shyǵarmashylyq toby túsirgen «Biz Qazaqstanǵa ınvestıtsııalaımyz!» beınerolıginiń kórsetilimi bastaldy.
Beınerolıktiń tapsyrýshylary - QR Indýstrııa jáne jańa tehnologııalar mınıstrliginiń ınvestıtsııalar jónindegi komıteti men osy mınıstrliktiń KAZNEX INVEST Eksport jáne ınvestıtsııalar jónindegi ulttyq agenttigi, dep jazdy «Kazahstanskaıa pravda» gazeti búgingi sanyndaǵy «Vıdeo o Kazahstane - v mırovoı translıatsıı» atty materıalynda.
Beınerolık áleýetti ınvestorlardy eldiń ınvestıtsııalyq múmkindikteri týraly aqparattandyrý úshin jasaldy. Ease Doing Business 2012 reıtıngisinde Qazaqstan bir jyldyń ishinde 58-shi orynnan 47-shi orynǵa kóterildi, 2010 jyly respýblıka 63-shi orynda turǵan edi.
Rolıktiń kórsetilimi aǵymdaǵy jyldyń 15 qarashasyna deıin jalǵasady. Bul ýaqyt aralyǵynda Qazaqstan týraly 30 sekýndtyq vıdeony CNN arnasynyń Eýropa, Taıaý Shyǵys, Afrıka jáne Azııa elderinde turatyn kórermenderi kóretin bolady. Euronews rolıkti bútin álem boıynsha taratsa, Bloomberg - AQSh pen Eýropa elderiniń aýmaǵynda kórsetedi. Osylaısha, beınerolıkti álem boıynsha 350 mln.-nan astam adam kóredi dep kútilýde. Rolıktiń barlyǵy 1,1 myń kórsetilimi josparlanǵan.
Halyqaralyq kórsetilim aıaqtalǵan soń beınerolık www.invest.gov.kz Ulttyq ınvestıtsııalyq veb-saıtyna ornalastyrylady.
