Biz Qazaqstanǵa árdaıym óz dostarymyzǵa kelemiz - voleıboldan Týnıs quramasynyń bas bapkeri
ALMATY. 27 tamyz. QazAqparat - Voleıboldan erler komandalary arasyndaǵy Afrıka qurlyǵynyń chempıony sanalatyn Týnıs quramasy «QR Prezıdenti kýbogy» HІH Halyqaralyq týrnırinde «Qazaqstan-1» men «Bahreın» komandalaryn basty qarsylastar dep sanaıdy.
Bul týraly Týnıs quramasynyń bas bapkeri Fethı Mkaoýer búgin Almatyda ótken baspasóz máslıhatynda málimdedi.
«Sońǵy 3 jylda Qazaqstan men Týnıs komandalary arasyndaǵy barlyq matchtar 3:2 esebimen aıaqtaldy. Búgin meımanhanada qazaqstandyq komandadan boıshań birneshe jas voleıbolshylardy kórdim. Qazaqstan quramasy jastarmen tolyqqany baıqalady. Onda sondaı-aq, qurlyqtyq jáne álemdik jarystarǵa qatysyp júrgen tájirıbeli oıynshylar da bar», - dedi F.Mkaoýer. Onyń aıtýynsha, Týnıs quramasy bul joly Londondaǵy HHH jazǵy Olımpıada oıyndarynda óner kórsetken alǵashqy altylyqtyń qataryn jas oıynshylarmen nyǵaıtyp kelip otyr. Olar Qazaqstanǵa kelgende árdaıym barlyq jaǵdaıdy nazarda ustap, ýaqyt aıyrmashylyǵy men klımattyq erekshelikke beıimdelý úshin eń kem degende 1 kún erte kelýge tyrysady. Jalpy eki eldiń ulttyq voleıbol federatsııalary arasynda ózara dostyq qarym-qatynas ornaǵan. Onyń ústine týrnırdiń deńgeıi óte joǵary. Sondyqtan olar munda árdaıym óz dostaryna kelip, Azııa men Eýropa voleıbolynyń qyr-syrymen keńirek tanysýǵa múmkindik alyp otyr.
