Biz qazaq xalqyn júrekpen túsinemiz - Túrkııa mınıstri
ASTANA. QazAqparat - Búgin Túrkııa-Qazaqstan bıznes forýmynyń ashylý saltanatynda sóz sóılegen Túrkııanyń ekonomıka mınıstri Nıxat Zeıkbedjı óz xalqynyń ystyq sálemin jetkizdi, dep xabarlaıdy QazAqparat tilshisi.
«Biz ata jurtymyzǵa kelgenimizge óte qýanyshtymyz. Qazaqstan - ata-babalarymyzdyń jeri. Búgin EKSPO kórmesinde Túrkııanyń ulttyq kúni atalyp ótýde. Bizdiń delegatsııamyzdy óte jaqsy qarsy aldy, ulttyq kúnine arnalǵan sharalar da joǵary deńgeıde uıymdastyryldy. Rızamyz! Ata jurtymyzǵa kelip, tolqyp otyrmyz. Bul jerde ózimizdi úıde júrgendeı sezinemiz. Taǵy bir aptadaı júrsek, qazaq tilinde erkin sóılep ketemiz. Sebebi qazirdiń ózinde bir-birimizdiń tilimizdi túsiný qıyn emes. Al, eń bastysy, biz bir-birimizdi júrek arqyly túsinemiz. Sebebi júrektiń tili ortaq», - deıdi Zeıkbedjı.
Onyń aıtýynsha, qazirgi eki jaqtyń saýda-ekonomıkalyq baılanystary oıdaǵydaı damyp keledi. Alaıda ol baılanystardy áli de kúsheıtýge bolady.
«Shyny kerek, eki jaqty alys-beristiń basym bóligi tabıǵı resýrstarǵa tıesili. Bizge basqa salalarda da baılanystardy damytý qajet. Saýda-sattyqtyń kólemin 5 mlrd dollarǵa jetkizý kerek. Eki eldiń prezıdentteri osyndaı mejeni belgilep otyr. Negizi, Nazarbaev pen Erdoǵan bir-birin dos retinde ǵana emes, baýyr retinde de qatty syılaıdy. Kásipkerler úshin osyndaı tyǵyz baılanystyń bolǵany tıimdi. Sebebi saıası qarym-qatynas jaqsy bolsa, ekonomıkalyq baılanystar da jaqsy damıdy», - dep atap kórsetti Zeıkbedjı myrza.
Aıta keteıik, búgin Astanadaǵy EKSPO kórmesinde Túrkııa respýblıkasynyń ulttyq kúni atalyp ótýde. Osyǵan oraı, kórme aıasynda jáne odan tys jerde san alýan mádenı-buqaralyq, iskerlik sharalar bastalyp ketti.
