Biz qaıtalama sanktsııalarǵa jol bermeımiz - Qarjy mınıstri

ASTANA. QazAqparat – Úkimet otyrysynan keıin BAQ ókilderiniń saýalyna jaýap bergen Qarjy mınıstri Erulan Jamaýbaev Qazaqstan qaıtalama sanktsııalarǵa jol berilmeıtinin málimdedi, dep habarlaıdy QazAqparat tilshisi.

Buǵan deıin BAQ betterinde Qazaqstan salynǵan santsııalardy aılanyp ótip, Reseıge chıpter men drondar tasymaldap jatyr degen aqparat tarady.

«Men qazir qandaı kompanııa týraly aıtyp otyrǵanyńyzdy bilmeımin. Biraq, qazir bizde táýekelderdi basqarýdyń naqty júıesi bar. Biz qaıtalama sanktsııalarǵa jol bermeımiz. Onyń ishinde soǵys qımyldaryn ýshyqtyratyn taýar túrleri de bar», - dep toqtaldy Erulan Jamaýbaev.

Qosa ketsek, Qazaqstan qarjy sektorynyń qaıtalama sanktsııalarǵa túspeýi úshin tıisti sheshim qabyldady. Atap aıtqanda, elimizdegi ekinshi deńgeıli bankter Reseıge qatysty sanktsııa talaptaryn oryndaý baǵytynda tıisti rásimderdi kúsheıtti.