Biz kásipkerlerdiń jeteginde ketip qaldyq - Baqytjan Saǵyntaev
ASTANA. QazAqparat - QR Premer-Mınıstri Baqytjan Saǵyntaev tondardy tańbalaý sııaqty sharalardy der kezinde qolǵa alýdy tapsyrdy. Sebebi bıýdjet mıllıardtaǵan salyqtan qaǵylyp otyr. Bul týraly ol búgin Úkimet otyrysynda aıtty, dep xabarlaıdy QazAqparat tilshisi.
"Shyny kerek, biz eki jyldy ótkizip aldyq. Al bizdiń áriptesterimiz - Reseı men Belarýs eshkimge qaramaı, tondardy tańbalaýdy birden bastap ketti de, osy ýaqytqa deıin mıllıardtaǵan aqshany bıýdjetke túsirdi. Kóleńkeli ekonomıkany azaıtyp, aqsha aınalymyn ashyq júrgizýdiń birden-bir joly - osy. Biz bolsaq, endi ǵana qolǵa alyp otyrmyz. Úsh kún boldy, 60-aq tondy tańbaladyq. Ashyǵyn aıtý kerek, biz keı kezde bıznestiń jeteginde ketip qalamyz. Sóıtip, eki jyldy ótkizip aldyq. Qazir pılottyq jobany qolǵa aldyq. Endi, ony aıaqtap, barlyq salaǵa taratamyz degenshe taǵy ýaqyt ketedi", - dedi Baqytjan Saǵyntaev.
QR Qarjy mınıstri Baqyt Sultanovtyń sózine qaraǵanda, taýarlardy elektrondy tańbalaý aıasynda aldymen tondardy tańbalaý jobasy qolǵa alyndy. Pılottyq joba 27 qarashada bastaldy. "Qazirgi kezde elektrondy júıege 20 kompanııa qosyldy. Úsh kúnniń ishinde 60 ton tańbalandy. Kelesi jyly osy jobanyń negizinde basqa taýarlardy tańbalaý sharalary da bastalady", - dep atap kórsetti Sultanov.
