Biz qashan da Elbasymen birgemiz! - batysqazaqstandyq sportshylar
«Biz sportshy retinde Tuńǵysh Prezıdentimizdiń qoldaýyn árdaıym sezinip júrdik. Bul sheshimnen keıin Elbasymyzǵa onyń eńbegi úshin tarıhı baǵasyn bere aldyq pa degen suraq týyndaıdy. Jańadan taǵaıyndalǵan Prezıdent Qasym-Jomart Toqaev astanamyzdy Elbasynyń esimimen ataý jóninde usynys kóterdi. Astananyń ár ǵımaratynyń qalanýyna sebepshi bolyp, óziniń balasyndaı damýyna úles qosqan Elbasymyzǵa nege esimin bermeske?!»,-dedi ujym ókilderi.
Olardyń aıtýynsha, mundaı jaǵdaılar tarıhta kóp kezdesedi. Mysaly, Vashıngton, Sankt-Peterbýrg sekildi qalalar osyndaı tulǵalardyń esimin aldy. Sondyqtan, Astana qalasy atanyp júrgen qala endigi kezekte Nur-Sultan esimin alsa - onyń esh oǵashtyǵy joq.
«Bizdiń ómirimiz sportpen tikeleı baılanysty, ár elge jarystarǵa shyǵyp júremiz. Sol kezde jeńiske jetip, elińniń aty atalǵanda jáne Qazaqstan ánurany oınaǵan kezde úlken qýanyshqa bólenetimizdi barlyǵy biledi. Tereńirek oılansaq, ár jeńiske jetýimizge úlken sport dodalaryna qatysýǵa múmkindik alǵanymyz - Táýelsiz elimizdiń arqasy!
Kók baıraǵymyz bıikte, el ishinde soǵys joq, beıbit ómir súrip jatyrmyz! Mine, osy faktorlardyń barlyǵy bizdiń álemge Qazaq sportshysy ekenimizdi tanytýǵa jaǵdaı jasady. Al bul kúnimiz úshin Elbasyǵa - Tuńǵysh Prezıdentimizge alǵys aıtýdan basqa aıtarymyz joq. Sondyqtan elimizdiń bas qalasy álem elderi arasynda bedeli bar, óz elin sheksiz súıip, halqyna bar ómirin arnaǵan Elbasymyzdyń atymen atalǵany oń sheshim dep oılaımyz!»,-deıdi sportshylar.