Biz ımandylyq turǵysynan rýhanı jańǵyrýymyz qajet - professor
«Qazir búkil álemde rýhanı jańǵyrý júrip jatyr. «mýltımádenıet», sosyn «ulttyń ózin-ózi tanýy» deıdi. Sońǵy kezde Eýropa birlikti qalaı saqtaımyz dep dal bolyp jatyr. Anglııa Eýropa odaqtan shyqqannan keıin barlyq basshylar jınalyp, Rım Papasyn shaqyrdy. Sonda Rım Papasy: «Biz Eýropa bir qundylyq - hrıstıan mádenıeti negizinde ǵana birigemiz»,- dedi. Olar muny jasyrǵan emes. Buryńǵy «mýltımádenıet» ıdeıasy iske aspaı qalǵanyn da moıyndaýda. Taǵy bir mysal keltireıin, taıaýda Vengrııa demokratııa máselesin kótergende Germanııa kantsleri Angela Merkel minbege shyǵyp, lıberaldy demokratııanyń tek hrıstıandyq úlgide ǵana bola alatynyn ashyq aıtty. Sondyqtan biz de ımandylyq turǵysynan rýhanı jańǵyrýymyz qajet dep bilemin. Búginde meniń pikirimmen kelispeıtinder bar shyǵar. Aramyzda «biz zaıyrly memleketpiz» deıtinder kóp. Osydan on-on bes jyl buryn qyrylyp, sol zaıyrlylyqty taba almadyq qoı. Zaıyrlylyqty dinniń syrtynan izdep júrmiz. Sóıtsek zaıyrlylyq dinniń ishinde eken. Ony Merkeldiń ózi aıtyp otyr», - deıdi Z. Kenjalıev.
Osy oraıda ǵalym Túrkııa, Indonezııa, Mysyr sııaqty memleketterdi mysal retinde keltirdi. «Ózimizdiń qaı memleket ekendigimizdi túsinip alǵanda ǵana qaı baǵytta damý qajettigin anyqtaı alamyz. Ásirese, rýhanı jańǵyrý kezinde ol baǵytty anyqtap alǵan asa mańyzdy»,- dep atap kórsetti ǵalym.
Aıta keteıik, búgin QR Joǵarǵy sotynda «Rýhanı jańǵyrý - máńgilik el bolýdyń kepili» taqyrybynda «dóńgelek ústel» ótti. Alqaly jıynǵa tarıhshylar, til mamandary, ádebıetshiler men sýdıalar qatysyp, «Bolashaqqa baǵdar: rýhanı jańǵyrý» maqalasyna, sondaı-aq «Týǵan jer», «Qazaq tilindegi 100 oqýlyq», «Qazaqstannyń kıeli jerler geografııasy» sııaqty jobalarǵa qatysty óz oılaryn ortaǵa saldy. Sol jerde Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń dırektory Erbol Tileshov oqýlyqtardy aýdarýǵa qatysty óz usynysyn ortaǵa salyp, aldaǵy ýaqytta «Balalar álemi» memlekettik portalynyń ashylatyndyǵyn jetkizdi . Al professor Dıhan Qamzabekuly qazirgi jańǵyrý Alash zııalylarynyń júrip ótken joly ekenin taǵy bir márte eske salyp , qazirgi sapasyz oqýlyqtardyń basty sebebin atady .
