Biz halyqtyń ál-aýqaty boıynsha TMD elderinen ozyp, halyqaralyq reıtıngte 50-orynǵa ıe boldyq - Elbasy
ASTANA. 25 mamyr. QazAqparat /Marlan Jıembaı/ -Biz halyqtyń ál-aýqaty boıynsha TMD elderinen ozyp, halyqaralyq reıtıngte 50-orynǵa ıe boldyq.
Bul týraly búgin Astanada ótip jatqan Dúnıejúzi qazaqtarynyń IV quryltaıynda QR Prezıdenti - Dúnıejúzi qazaqtary qaýymdastyǵy Tóralqasynyń tóraǵasy Nursultan Nazarbaev aıtty.
«Osy jyldardyń ishinde elimiz jahandyq aýqymdaǵy úsh daǵdarystyń tolqynyna tótep berip, jańa dáýirge qadam basty. Biz daǵdarys tusyndaǵy damýdyń dańǵyl jolyna túsken el atandyq»,-dedi Memleket basshysy.
QR Prezıdentiniń alǵa tartqan derekterine sáıkes, 1994 jyly Іshki jalpy ónim ár adamǵa shaqqanda 70 dollardan bolsa, búgingi kúni ol janbasyna 9 myń dollarǵa jetip, 12 ese ósti. Álemdik tájirıbede óz táýelsizdiginiń 20 jyldyǵynda mundaı nátıjege eshqandaı el qol jetkizip kórgen emes.
«Biz halyqtyń ál-aýqaty boıynsha TMD elderinen ozyp, halyqaralyq reıtıngte 50-orynǵa ıe boldyq. Qazir Qazaqstan halyqaralyq rezervter deńgeıi boıynsha dúnıedegi alǵashqy 50 memlekettiń qatarynda. Ulttyq qordy qosqanda qazir bizdiń 73 mlrd. dollar qarajatymyz bar»,-dedi Elbasy.
Prezıdent daǵdarys jyldarynda álemniń kóptegen elderinde jalaqy, zeınetaqy, shákirtaqylar qysqartylǵanyn aıta kele: «Al biz bolsaq, kerisinshe bul kórsetkishterdi jyldan jylǵa ósirip otyrmyz. Sońǵy 10 jylda muǵalimderdiń jalaqysy - 5 ese, dárigerdiń jalaqysy - 7 ese, zeınetaqynyń ortasha mólsheri 6 ese ósti»,-dedi.
