Biz halyqaralyq «Týr Almaty» velojarysyn jyl saıyn ótkizýdi josparlap otyrmyz - A. Esimov
ASTANA. 9 qazan. QazAqparat - Búgin Almaty qalasynyń ákimi Ahmetjan Esimov Olımpıada chempıony Aleksandr Vınokýrovty qabyldady. Kezdesýde «Týr Almaty» velojarysynyń qorytyndylary áńgimelendi.
«Aleksandr Vınokýrov Almaty ákimine Qazaqstanda alǵashqy velotýr ótkizýdi uıymdastyrǵany úshin alǵysyn bildirdi. Ol atalǵan sporttyq sharanyń halyqaralyq sporttyq qoǵamdastyqta oń ózgeris týǵyzǵandyǵyn jetkizdi.
UCI ekspertteri atap ótkendeı, trassa men jarysty uıymdastyrý óte joǵary deńgeıde boldy. Velosport álemindegi mundaı este qalarlyq oqıǵadan keıin budan da joǵary jarystardy ótkizýge múmkindigimiz mol», - dedi Aleksandr Vınokýrov.
Aleksandr Vınokýrov 2017 jylǵy Álem chempıonatyn ótkizýge eń qolaıly oryn Almaty dep atap ótti.
«Ákim retinde maǵan qalalyqtardyń bul sporttyq sharaǵa degen oń kózqarasyn baqylaý ári ańǵarý jaqsy áser qaldyrdy. Olardyń boıyn maqtanysh sezimi kernep, qazaqstandyq komandalar úshin jankúıer boldy. Budan bylaı «Týr Almaty» velojarysyn jyl saıyn ótkizýdi josparlap otyrmyz», - dedi Ahmetjan Esimov.
Búgin qala basshysy UCI keńesshisi Djek Vatsonnan erekshe hat aldy. Ol óziniń hatynda Velosıpedshiler Halyqaralyq Odaǵynyń komıssar prezıdentiniń velojarystyń ótýine óte rıza ekendigin jazypty.
«Men «Týr Almatyny» ózim qatysqan velojarystardyń ishindegi eń qaýipsiz ári óte joǵary deńgeıde uıymdastyrylǵan sporttyq shara retinde qabyldadym», - dep atap ótipti UCI komıssar-prezıdenti atynan Djek Vatson.
«Týr Almaty» - UCI aıasynda ótken bir kúndik 1,2 kategorııadaǵy velojarys. Oǵan álemniń 20 elinen 20 komanda qatysty. «Týr Almatynyń» jeńimpazy - qazaqstandyq quramanyń oıynshysy Maksım Iglınskıı. Ekinshi orynda - Sonnı Solberellı Bardiani Valvole - CSF Inox-tan, úshinshi oryndv qazaqstandyq Rýslan Tileýbaev ıelendi.
