Biz «Halyq pen Elbasy – birtutas» uranymen Elbasynyń tóńiregine toptasa bilýimiz kerek – BQO orys mádenıeti ortalyǵynyń tóraǵasy Sergeı Pogodın
Batys Qazaqstan oblystyq Qazaqstan halqy Assambleıasy tóraǵasynyń orynbasary Sergeı Pogodın boldy. Ol QazAqparat tilshisine óz oı-tolǵamyn bylaısha áńgimelep berdi.
- Atalmysh jıynda tórtkúl dúnıege tanymal aqyn Oljas Súleımenov, «Halyq qaharmany» Baqytjan Ertaev syndy el qadirleıtin azamattarmen qatar sóz alǵanyma qýanyshtymyn, - dep bastady sózin S. Pogodın. - Mundaı ortada sóz sóıleýdiń qanshalyqty qıyn ekendigin bilemin. Qaǵazǵa jazyp alǵanym da bar edi. Biraq Elbasyna degen lebiz júregimnen óz-ózinen tógilip júre berdi. Men aldymen Qazaqstandaǵy orys halqynyń ókili retinde qazaqstandyq qandastarymnyń ózimiz saılaǵan Prezıdentimizdiń dana da sarabdal saıasatyn osyǵan deıin de, budan keıin de qoldaı beretindigin aıttym.
Qazirgi álem qaıshylyqqa toly. Aınalada, atap aıtqanda, Taýly Karabaqta, Prıdnestrovede, Grýzııa men Qyrǵyzstanda ultaralyq jáne dinaralyq qaqtyǵystar bolyp jatqan kezeńde Qazaqstan beıbitshilik pen kelisim, dostyq pen tatýlyq saltanat qurǵan aral sekildi. Bul rette Prezıdenttiń bastamasymen qurylǵan Qazaqstan halqy Assambleıasy, san ult ókilderiniń minbesi, onyń kelisim komıssııasy asa mańyzdy rol atqarady. EQYU-ǵa tóraǵalyq etken aıdarly jylda Qazaq eliniń kóshbasshysy Nursultan Nazarbaev jarııa etken senim, dástúr, ashyqtyq, tózimdilik uǵymdary áldeqashan kóp ultty elimizdiń ómirimen bite qaınasyp ketti.
Qazirgi tańda biraz kóship-qonýdan keıin qazaqstandyq orystardyń jańa qaýymdastyǵy qalyptasty dep aıtýǵa bolady. Biz Qazaqstandy óz Otanymyz dep bilemiz, sondyqtan ortaq úıimizde shyn yqylas-peıilimizben eńbek etýdemiz, munyń ıgiligin kúni erteń óz urpaqtarymyz sezinetin bolady. Biz Prezıdentimizdiń 2002 jyldy Qazaqstandaǵy Reseı jyly, al 2004 jyldy A.S.Pýshkın jyly dep jarııalap, Reseı Federatsııasymen máńgilik dostyq pen ózara kómek týraly kelisimge qol qoıǵanyna tántimiz. Biz Elbasymyzdyń ózi jetik biletin orys tilin ultaralyq qarym-qatynas tili retinde qurmetteıtinine rızamyz. Asa mańyzdy forým-jıyndarda sóziniń bir bóligin orys tilinde jetkizetinin kúlli álem biledi. Biz Elbasymyzǵa Qurban aıt sekildi orystar úshin qasıetti meıram Rojdestvony demalys kúni etkeni úshin sheksiz rızashylyǵymyzdy bildiremiz.
2011 jyl Qazaqstan úshin aıryqsha jyl bolǵaly tur. Óıtkeni bul jyly búkil respýblıka halqy úshin qasterli Táýelsizdigimizdiń 20 jyldyǵy atalyp ótiledi. Osy jyldar ishinde áleýmettik-ekonomıkalyq jáne mádenı salada qol jetkizgen ulanǵaıyr tabystarymyzdy biz Prezıdentimiz Nursultan Ábishulynyń esimimen baılanystyramyz. El dep tynym tappaǵan Elbasymyzdyń orasan zor kúsh-jigeri arqasynda Qazaqstanda sońǵy jyldary tıimdi saıası, ekonomıkalyq jáne áleýmettik reformalar júzege asyrylýda. Sonyń nátıjesinde Prezıdentimiz álemdik deńgeıdegi tarıhı qaıratkerlermen ıyq tirestire alatyn biregeı tulǵaǵa aınaldy. N. Nazarbaev Birinshi Petr patsha sekildi búkil qazaqstandyqtardyń maqtanyshyna aınalǵan kórikti Astanany turǵyzdy. Abraham Lınkoln sııaqty qıyn kezeńde el táýelsizdigin saqtaı bilip, Tomas Djeffersondaı egemen Qazaqstannyń jańa Ata zańyn jasap, qabyldady.
Bizdiń bárimiz úshin Prezıdent ózi sózin jazysqan Ánuranymyz sekildi memlekettik qasterli uǵymdarmen astasyp jatyr. Biz úshin Elbasy belgilep, BUU moıyndaǵan myzǵymas shekaramyz, ulttyq valıýtamyz, Semeı polıgony tárizdi ıadrolyq ajdahadan qutylǵanymyz da sondaı mańyzdy. Qazaqstan tabystary arqasynda Nursultan Nazarbaev burynǵy keńes keńistiginde qadir tutatyn tulǵaǵa aınaldy. Astanada úsh dúrkin álemdik jáne dástúrli dinder seziniń, ekonomıkalyq, dinı kelisim forýmdarynyń jáne túptep kelgende EQYU Sammıtiniń ótkizilýi Qazaqstan men Elbasymyzdyń bedeli bıik, alǵan asýy asqaq ekendigin kórsetedi. EQYU jıynynyń on bir jyldyq úzilisten keıin tuńǵysh ret Azııa elinde, ǵajaıyp Astanada uıymdastyrylýy uıym kókjıegin keńeıte bilgen Elbasynyń tikeleı eńbegi ekeni daýsyz. Osymen Nursultan Nazarbaev ózi birneshe ret kótergen eýrazııalyq ıdeıadan aınymaıtynyn dáleldedi. Bizdiń Prezıdentimiz TMD elderi basshylary kezdesýlerine, Shanhaı yntymaqtastyǵy uıymynyń, Keden odaǵynyń jáne Ujymdyq qaýipsizdik sharty uıymynyń basqosýlaryna udaıy belsene aralasyp keledi.
El damýyn belgilep bergen 2020 jylǵa deıingi baǵdarlama men 2030 jylǵa deıingi strategııanyń avtory N.Á.Nazarbaev ekeni belgili. Endeshe, ózi josparlaǵan, bastaǵan isti aıaǵyna deıin ózi jetkizgeni lázim.
Qazirgideı álemdik daǵdarys kezinde tehnıkalyq úrdisterdi jedel damytyp, ǵylymǵa negizdelgen óndiris quryp, dúnıejúzilik deńgeıge jetkizý úshin halqymyzǵa tynysh ta qalypty jaǵdaı kerek. Mundaı jaǵdaıda bıliktiń aýyspaǵany tıimdi, reformalar júrgizilip jatqan eldi sheber basqara alatyn usynyqty qol qajet. Sondyqtan qaı jaǵynan alǵanda da, buǵan óz Otanyn sheksiz súıetin, Qazaqstan halqynyń ıgiligi úshin jarǵaq qulaǵy jastyqqa tımeı júrgen Nursultan Nazarbaev tolyq saı keledi. Bizdiń kóshbasshymyzdyń boıynda tereń de jan-jaqty biliktilik, kúshti qýat, qazaq halqynyń ǵasyrlyq aqyl-oıy, kóp jylǵy tájirıbe, memleket basshysyna qandaı qasıet kerek bolsa, sonyń bári bar.
«Biz ótkizilýi kózdelip otyrǵan referendým nátıjesinde kóp ultty halqymyzdyń Prezıdentti qoldaıtynyna senemiz. Osy turǵydan alǵanda, 2012 jyly kezekti saılaý ótkizý qajet te emes. Ol saılaýda báribir Elbasymyz sózsiz jeńip shyǵar edi. Biraq saılaýdyń qoǵamdy alańdatyp, qajetsiz shyǵyndardy kóbeıtetini belgili. Eń bastysy, ol ulttyq tatýlyq pen turaqtylyq kemesin teńseltpese deımiz. Muny batysqazaqstandyqtar da jaqsy túsinedi. Sondyqtan «Halyq pen Elbasy - birtutas» urany aıasynda Ult kóshbasshysynyń tóńiregine toptasa bilýimiz kerek. Bul bizdiń erteńimiz úshin, Qazaqstannyń odan ári damyp, gúldenýi úshin qajet», - dep túıindedi oıyn S.Pogodın.
