Biz ǵylym ózin-ózi qarjylandyratyn deńgeıge jetken joqpyz - Á. Bektibaev
ALMATY. Aqpannyń 24-i. QazAqparat /Erlik Erjanuly/ - Qazaqstandaǵy óndiris oryndary qazba baılyqty qanshalyqty ysyrapsyz óndirip jatqany áli belgisiz bop qalýda. Bul Parlamentte talqylanyp jatqan "Ǵylym týraly" jańa zań jobasynda eskerilýi kerek.
Búgin Almatyda uıymdastrylǵan "D.A.Qonaev jáne onyń ýaqyty" dep atalatyn dóńgelek ústel jıynynda osy týraly aıtyldy, dep habarlaıdy QazAqparat.
"D. Qonaev atyndaǵy taý-ken ınstıtýtynda jer qoınaýyndaǵy barlanǵan qordy qazyp alýdy zetteýmen aınalysatyn 17 zerthana bar. Biz kendi ysyrapsyz óndirýdiń tehnologııasyn jetildirýmen aınalysamyz. Bul baǵytta keı máselelerde álemdik deńgeıdemiz, al keıbirinde artta kele jatyrmyz. Máselen, qazir bizde qazba baılyqtardy óndirýde kemshilikter oryn alyp jatyr. Qarjynyń jetkiliksizdiginen zertteý jumystary kesheýildeýde. Qazir óndiris oryndary túgeldeı jeke qolǵa kóship ketkendikten, olar «málimetter óndiristik qupııa» dep ǵalymdary kenishtegi óndiristik úderisterdi zertteýge jibermeıdi. Sondyqtan, onda qandaı tehnologııalar qoldanylyp jatyr, ony qalaı jetildirý kerek jáne bul jumysqa qansha qarjy bólinip jatqanynan biz beıhabarmyz", deıdi tehnıka ǵylymnyń doktory Ádilǵazy Bektibaev. Halyqaralyq mıneraldyq resýrstar akademııasy akademıginiń aıtýynsha, óndiris oryndary zertteý ınstıýttaryna tehnologııany jetildirýge múmkinshilik bermeıdi. Sondaı-aq olarǵa bul jumyspen aınalysýǵa qarjy bólýge qulyqsyz. "Mundaı jaǵdaı tek bizde ǵana oryn alyp otyr. Basqa elderde ǵylymı zertteýge kedergi joq. Tehnologııany úzdiksiz jetildirý zańmen bekitilgen. Qazaqstan bul máselede ózgelerden qalyp qoıdy. Máselen, qazir D. Qonaev atyndaǵy taý-ken isteri ınstıýtynda qarjynyń jetkiliksizdiginen 17 zerthananyń beseýinde qyzmetkerler aqysyz demalysta júr. Al olardyń aqyl-oıy qoǵam ıgiligine áli de qyzmet ete alady. "Ǵylym týraly" jańa zań jobasynda bul másele eskerýsiz qalmaýy kerek. Olardy qoldap, damytý úshin bazalyq qarajat bólinýi qajet. Biz ǵylym ózin-ózi qarjylandyratyn deńgeıge jetken joqpyz", deıdi D. Qonaev atyndaǵy taý-ken isteri ınstıtýtynyń zerthana meńgerýshisi Ádilǵazy Bektibaev.
