Biz eshnárseni jasyryp jappaı, ashyq jaǵdaıda kez kelgen memlekettik tildiń bolashaǵyna jany ashıtyn azamattarmen ony talqylaýǵa ázirmiz -Muhtar Qul-Muhammed
ALMATY. Qańtardyń 22-si. QazAqparat /Erlik Erjanuly/ - Elbasynyń júrgizip otyrǵan til saıasatynyń arqasynda táýelsizdik jyldarynda qazaq tili buryn-sońdy bolmaǵan bıikke kóterildi.
Bul týraly keshe, Almatyda tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasyn ázirleý jónindegi jumys tobynyń otyrysynda aıtyldy, dep habarlaıdy QazAqparat.
"Eger biz bir kezderi ulttyń uly tragedııasy retinde 600 mekteptiń jabylǵanyn jıi aýyzǵa alatyn bolsaq, tek qana táýelsizdiktiń 18 jylynda 880-nen astam mektep ashyldy. Munyń bári ult rýhanııatynyń uly jeńisi dep aıtýǵa bolady. Qazaq tilindegi basylymdardyń taralymy, qazaq tilindegi kitaptardyń sany jyl saıyn artyp kele jatyr. Qazaq tilin damytýǵa Elbasy tarapynan barlyq jaǵdaı jasalǵan. Sonymen birge biz kópultty memleket bolǵannan keıin basqa tilderdiń damýyna da nazar aýdarýymyz kerek. Búgingi otyrys osy bir ózekti máselelerge arnaldy. Biz eshnárseni jasyryp jappaı, ashyq jaǵdaıda kez kelgen memlekettik tildiń bolashaǵyna jany ashıtyn azamattarmen ony talqylaýǵa ázirmiz", dedi basqosýda Mádenıet jáne aqparat mınıstri Muhtar Qul-Muhammed. Jaryssózge qatysqan 17 adamnyń sózderin muqııat tyńdap, usynystaryn jazyp alǵanyn aıtqan Muhtar Abraruly, baǵdarlama qabyldanǵansha taǵy eki kezdesý ótkizgisi keletinin jetkizdi. Onyń alǵashqysy baǵdarlama jobasyn ázirleý jumysynyń orta sheninde, al ekinshisi sońyna taman ótpek. «Sol kezde búgingi basqosýda aıtylǵan suraqtarǵa tolyq jaýap beriletin bolady».
