Biz eshbir dinı birlestikke basymdyq berip otyrǵan joqpyz - Q. Lama Sharıf
ASTANA. 27 qyrkúıek. QazAqparat - Biz eshqandaı dinı birlestikke basymdyq berip otyrǵan joqpyz.
Búgin Senattyń jalpy otyrysynda «Qazaqstan Respýblıkasy men Qasıetti Taq arasyndaǵy Ózara qatynastar týraly kelisimdi ratıfıkatsııalaý týraly» talqylaý barysynda Din isteri agenttigi tóraǵasy Qaırat Lama Sharıf osylaı málim etti.
Talqylaý barysynda senator Ikram Adyrbekov elimizde buǵan deıin qabyldanǵan dinı birlestikter týraly zańǵa atalǵan kelisimniń qaıshy keletini týraly pikirler aıtylatynyn eske sala kele, «bir dindi nemese onyń birlestikterin erekshe jaǵdaıǵa qoımas úshin jáne osy kelisimshartty kelisi jyly merzimi bitken soń qaıta qaraý kerek emes pe?» degen saýal qoıdy.
Soǵan oraı Din isteri agenttiginiń tóraǵasy Qaırat Lama Sharıf qabyldanǵan jańa zańda Qazaqstanda barlyq dinder men dinı birlestikterdiń zań aldynda bári birdeı ekendigi kórsetilgenin atap ótti.
«Bul kelisimdi qabyldaý ondaı qaǵıdattarǵa qaıshy emes. Degenmen, bul kelisim 1998 jyly, ıaǵnı 14 jyl buryn qabyldanǵan edi. Qujatqa sáıkes, ol alǵashqy on jyldan, sodan keıingi bes jyldan keıin ózgerister engizýge jatatyn. Soǵan oraı, kelesi besjyldyq merzim 2013 jyly bastalady. Sol tusta Qazaqstan tarapy kelisimdi qazirgi zań talaptaryna sáıkes jetildirý, tolyqtyrý, ózgerister engizý týraly jumys jasaıdy dep senemin», - deıdi Q. Lama Sharıf.
Budan bólek, agenttik tóraǵasy zań normasyna sáıkes, dinı birlestikterdiń barlyǵyna qoıylar talap birdeı ekenin jetkizdi. «Olardyń birine artyqshylyq jasap, ekinshisin kóterip jatqan joqpyz», - dedi Q. Lama Sharıf.
