Biz eńbek adamdaryn emes, ánshilerdiń ómirin nasıhattap kettik - Qashqynbaev
ASTANA. QazAqparat - Biz muǵalimderdi, aýyl sharýashylyǵynyń mamandaryn dáriptemeı, ánshilerdiń ómirine basa mán berip kettik. Bul týraly QR BǴM Ǵylym komıteti Memleket tarıhy ınstıtýty dırektorynyń orynbasary Amangeldi Qashqynbaev osylaı aıtty, dep habarlaıdy «QazAqparat» HAA tilshisi.
«Elbasynyń osy jolǵy Joldaýyna túrtki bolǵan bir-eki oqıǵa týraly aıta keteıin. Esterińizde bolsa, Prezıdenttiń «Rýhanı Jańǵyrý» baǵdarlamasyn biz kóp taldadyq. Odan keıin Táýelsizdik kúni qarsańynda «Táýelsizdik dáýiri» atty kitaby shyqty. Osylardy salystyryp otyratyn bolsaq, maqala, kitap pen Joldaýdaǵy maqsattar birin-biri jalǵastyryp keledi», - deıdi Amangeldi Qashqynbaev Astanadaǵy Tuńǵysh Prezıdent - Elbasy kitaphanasynda Prezıdenttiń 10 qańtardaǵy Joldaýy talqylanǵan dóńgelek ústel otyrysynda.
Ǵalym Joldaýdyń aıasynda kóp talqylaý júrgizilip jatqanyn tilge tıek etti
«Búgin - 31 qańtar. Jyldyń 1 aıy ótip ketipti. Joldaý bir jylǵa arnalǵan. Osyǵan oraı «mynaý qajet pe, kerek emes pe» degen máselelerdiń tóńireginde júre beretin bolsaq, onda mindetter qaı ýaqytta iske asyrylady? Sondyqtan, meniń oıymsha, osyndaı jınalystarǵa naqty sala mamandaryn shaqyrsaq. ıAǵnı, máselen naqty ekonomıka boıynsha ne isteledi degen máseleni kótergen jón», - deıdi ol.
Dotsent óz sózinde Joldaý nasıhattaý kezeńinen ótip ketkenin aıtyp, talqylaýǵa baılanysty naqty bir máselelerdi keltirdi.
«Joldaýda aıtylǵan baǵdarlamaǵa ǵalym retinde qosylam. Sonyń ishinde adam kapıtalyna erekshe toqtalǵym keledi. Eger álemdegi barlyq bolyp jatqan ózgeristerge terezeniń syrtynan úńilip tura bersek, qur qalamyz. Biz qazirgi ýaqytta eńbek adamyn dáripteı almaı jatyrmyz. Muǵalimderdi, aýyl sharýashylyǵynyń mamandaryn dáriptep jatqan joqpyz. Biz tek qana óleń aıtyp, jeńil jolmen sahnaǵa shyǵyp jatqandarǵa mán berip kettik. Osy tóńirekte oılanýymyz kerek sekildi», - deıdi ol.
Amangeldi Qashqynbaev sonymen birge, árbir otbasylarda el ishi týraly aıtylyp jatqan áńgimege nazar aýdarý kerektigin sóz etti. Sebebi, ǵalymnyń aıtýynsha, otbasyndaǵy qarapaıym áńgime el ishinde bolyp jatqan oqıǵalarǵa reaktsııa bolyp tabylady.
«Jýyrda bir meıramhanadaǵy toı-jıynda jas jigit kóptiń aldyna shyǵyp, bılikke qatysty syn aıtyp jatyr. «Nege olaı dediń» desem, aýyl sharýashylyǵy «qulap» jatqanyn aıtady. «Jaraıdy. Seniń ákeń kezinde dúrildep turǵan sovhozdy basqarǵan adam. Sol sekildi sen de aýyl sharýashylyǵyn órkendetýge bilek sybana kirisip ketýge daıynsyń ba?» dep suradym. «Joq» dep jaýap berdi. «Sonda ol salany kóterýge kim barýy kerek? Sen ekeýimiz barmasaq, basqa bireý barýy kerek. Al sol «basqa bireý» óziń nege barmaısyń dese qaıtpekpiz» dedim. Osy jaǵdaıdyń eń jaǵymsyzy - kóptiń qoldap otyrǵany. Bos sózderge eliktep ketý bizdiń qoǵamda bar nárse», - deıdi dotsent.
Eske sala ketsek, 10 qańtarda Qazaqstan Respýblıkasynyń Prezıdenti Nursultan Nazarbaevtyń Qazaqstan halqyna «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýy jarııalanǵan bolatyn. Memleket basshysy óz Joldaýynda el aldyndaǵy 10 negizgi mindetti ataǵan edi.
