Biz el Prezıdentiniń osynaý tarıhı taǵdyrly jeńisterin zor alǵys sezimimen joǵary baǵalaımyz jáne maqtan etemiz-Májilis depýtaty A. Smaıyl
ASTANA. 29 jeltoqsan. QazAqparat - Búgin QR Parlamenti Májilisiniń Tóraǵasy Oral Muhamedjanovtyń jetekshiligimen osy Palatanyń jalpy otyrysy bolyp ótti. Onda Qazaqstan Respýblıkasy Prezıdentiniń ókilettigin uzartýǵa qatysty másele boıynsha depýtat Aldan Smaıyl sóz sóıledi.
-Biz, Parlament Májilisiniń bir top depýtattary, tuńǵysh Prezıdentimiz Nursultan Ábishuly Nazarbaevtyń ókilettigin uzartý jónindegi bastamany qýattaıtynymyzdy málimdeı otyryp, qazaqstandyqtardy osy bastamany qoldaýǵa shaqyramyz-, dep bastady sózin A. Smaıyl.
"Qazaq halqy, barsha qazaqstandyqtar taǵy bir tarıhı órleý men serpilis kezeńinde tur. Biz ózimizdiń el aldyndaǵy, qoǵam aldyndaǵy jaýapkershiligimizdi tolyq sezine otyryp, respýblıka barlyq jaǵynan álemmen úzeńgi qaǵystyrǵan tusta saıası jáne áleýmettik zerdelilik tanytýǵa tıispiz. Ekonomıkasy qaryshtap damyp, aldaǵy kúnderge búgingiden de zor mindetter qoıyp otyrǵan jáne sol murat-maqsattardy iskerlikpen sheshýge kirisken Qazaqstandy qazirgiden de qýatty qarqynmen damytýdyń birden-bir kepili - respýblıkamyzdyń tuńǵysh Prezıdenti Nursultan Ábishuly Nazarbaev. Halyq bir aýyzdan jáne erekshe júrek jylýymen ult Kóshbasshysy dep tanyǵan asa kórnekti memleket qaıratkeri tarıhı qysqa merzimde júzege asyrǵan saıası-ekonomıkalyq jáne áleýmettik-mádenı sharalar respýblıkamyzdy TMD aıasynda ǵana emes, Azııadaǵy qýatty memlekettiń deńgeıine kóterdi. Elbasy tolyq aýmaqtyq tutastyqty saqtaý arqyly táýelsiz memlekettiń irgesin nyǵaıtty. Іshki saıası turaqtylyq pen qoǵamdyq birlikti qalyptastyrý arqyly Qazaqstandy yntymaǵy jarasqan, dostyq atty teńdessiz qundylyqqa sútteı uıyǵan, tilegi de, júregi de bir ulttardyń sáýletti otanyna aınaldyrdy. Sheteldik ınvestıtsııalar men ishki damý qorlaryn ulǵaıta otyryp, ashyq naryqtyq ekonomıkaǵa negizdelgen údemeli qarqyndy ekonomıkany óristetti. EQYU-nyń Astana sammıti arqyly álem Qazaqstandy saıası zerdeli el retinde tanydy.
Biz el Prezıdentiniń osynaý tarıhı taǵdyrly jeńisterin zor alǵys sezimimen joǵary baǵalaımyz jáne maqtan etemiz. Zamanymyzdyń uly qaıratkeri retinde Qazaqstandy álem tórine shyǵarǵany úshin, týǵan halqynyń dana perzenti retinde ata jurtymyzdyń baǵyn jandyrǵany úshin, ásem de aıbyndy Astanamen saltanatymyzdy asyrǵany úshin myń da bir rahmet aıtamyz.
Biz birinshi Prezıdentimiz, Ult Kóshbasshysy Nursultan Ábishuly Nazarbaevtyń ókilettigin uzartý jónindegi bastamany qyzý qýattaımyz. Kemeldi búginimiz úshin de, búginnen de sáýletti bolýǵa laıyq erteńimiz úshin de qoldaımyz.
Qazaqstandyq patrıotızmniń búgingi urany - Prezıdent pen halyqtyń birtutastyǵy. Biz qazirgi tańqalarlyq jetistigimizdi odan ári baıandy etýge umtylsaq, ózimizdiń jáne keler urpaqtyń taǵdyryna senimdi bolǵymyz kelse, Qazaqstandy Orta Azııanyń ǵana emes, Eýrazııalyq ulanbaıtaq keńistiktiń qýatty da bedeldi memleketi retinde kórýdi qalasaq, ishki beıbit ómir men ulttyq rýhanı gúldenýdi tańdasaq, jańa HHІ ǵasyrdyń tórine Elbasymen birge qadam basýǵa tıispiz. Bul qazirgi zymyran ýaqyttyń talaby. Bul - órkendegen, talǵampaz da zerdeli halqymyzdyń talaby. Bul - bardy baǵalaı bilgen, asylyn ardaqtaı alǵan kókiregi oıaý barsha azamattyń muraty.
Biz qazaqstandyqtardy udaıy órkendeý men damýdyń tańdaýy bolǵan osynaý muratty qoldaýǵa shyqaramyz», - dedi A. Smaıyl.
Depýtat Aldan Smaıyldyń pikirin qoldap, áriptesteri: Satybaldy Ibragımov, Erjan Isaqulov, Amangeldi Momyshev, Dınar Nóketaeva, Nurtaı Sabılıanov, Bekbolat Tileýhan, Nurlan Ónerbaı, Gúlnár Seıitmaǵanbetova, Gúlmıra Isimbaeva, Jeksenbaı Dúısebaev Maıra Aısına qoldaryn qoıǵan.
