Biz dopıngtik daý-damaıdan durys nátıje shyǵardyq - QR aýyr atletıka federatsııasynyń basshysy
ASTANA. QazAqparat - Qazaqstannyń aýyr atletıka federatsııasy otandyq sportshylarmen bolǵan dopıngtik daý-damaıdan durys nátıje shyǵardy, dep habarlaıdy federatsııa basshysy Janat Túsipbekov "QazAqparat" tilshisine bergen suhbatynda.
"2014 jyldyń qorytyndylary boıynsha, bizge álem qaýymdastyǵy aldynda sol bir dopıngtik daýdan durys nátıje shyǵarǵanymyzdy dáleldeı aldyq dep esepteımin jáne biz dopıngke qarsy kúresti kúsheıte tústik. Osy maqsatta 2014 jyly sportshylar men bapkerlerge arnap 5 semınar uıymdastyryldy, sonyń ishinde Almatyda Halyqaralyq aýyr atletıka federatsııasy antıdopıngtik komıtetiniń tóraǵasy men prezıdentiniń qatysýymen iri semınar ótkizdik. Oǵan ózge de sport federatsııalarynyń ókilderi qatysty", - dedi J. Túsipbekov.
Sonymen qatar onyń sózine qaraǵanda, Qazaqstannyń aýyr atletıka federatsııasy tyıym salynǵan dárilerdi qoldaný faktileriniń tirkelýine baılanysty Halyqaralyq aýyr atletıka federatsııasyna jarty mıllıon AQSh dollary shamasynda aıyppul tóledi.
"Soǵan baılanysty bizdiń eń basty maqsattarymyzdyń biri - bapkerler men sportshylarǵa dopıng qoldaný qaýipti ári paıdasyz ekendigin jetkizý. Osy qubylyspen alda da ymyrasyz kúresetin bolamyz", - dep atap ótti ol.
Eske sala keteıik, dopıngtik daý-damaı 2013 jyly oryn aldy. 13 qazaqstandyq aýyr atlet (10 jasóspirim men 3 eresek) tyıym salynǵan preparattar qoldanǵandyǵy anyqtaldy jáne 2 jylǵa sporttan shettetildi.
