Biz daǵdarys úrdisterin eńseremiz, bul úshin daıyndyǵy bar jáne isti biletin jańa depýtattar qajet - QR Prezıdenti
ASTANA. QazAqparat - Memleket basshysy Nursultan Nazarbaev Astana qalasynyń Mektep oqýshylary saraıyndaǵy №81 saılaý ýchaskesinde boldy, dep habarlady Aqordanyń baspasóz qyzmeti.
Nursultan Nazarbaev Parlament Májilisi men máslıhat saılaýynda daýys berdi.
Memleket basshysy saılaýǵa qatysý arqyly mıllıondaǵan qazaqstandyqtar sııaqty óziniń konstıtýtsııalyq quqyǵy men azamattyq boryshyn júzege asyrǵanyn atap ótti.
- Májilis jáne jergilikti ókildi bılik organdarynyń búgingi saılaýy - Qazaqstannyń qazirgi zaman tarıhyndaǵy óte mańyzdy kezeń. Qazaqstanda jáne álem boıynsha eldiń 9 mıllıonnan astam azamaty 9900-deı saılaý ýchaskesinde daýys beredi. Kezekten tys saılaý qazir ómirimizdiń barlyq salasynda jańarý júrip jatqanyn sezingen el Parlamentiniń bastamasymen ótkizilip otyr. Biz daǵdarys úrdisterin eńseremiz, bul úshin daıyndyǵy bar jáne isti biletin jańa depýtattar qajet, - dedi Qazaqstan Prezıdenti.
Nursultan Nazarbaev el azamattarynyń saılaýdaǵy belsendiligin de atap ótti.
- Búgin ertemen qazaqstandyqtar otbasylarymen, balalarymen ýchaskelerge kelip, daýys berýge belsene qatysýda. Bul azamattarymyzdyń bılikke, sonyń ishinde zań shyǵarýshy bılikke degen senimin bildiredi. Biz búgin elimizge qajetti Parlamentti saılaıtynymyzǵa senimdimin, - dedi Memleket basshysy.
Qazaqstan Prezıdenti otandyq jáne sheteldik BAQ-qa arnalǵan brıfıngte birqatar saýaldarǵa jaýap berdi. Máselen, Memleket basshysy atqarýshy organdardyń ókildi bılik aldyndaǵy eseptiligin júzege asyrý tetikteri týraly aıtyp berdi.
- Zańnamaǵa sáıkes, úkimettiń jumysyn, sonyń ishinde bıýdjet qarajatynyń shyǵystaryn baqylaý úshin Parlamenttiń barlyq ókilettigi bar. Sondaı-aq zań qabyldanǵannan keıin Parlament sol normalardyń iske asyrylýyn qadaǵalaýy tıis, - dedi Nursultan Nazarbaev.
Qazaqstan Prezıdenti saıası júıeniń yqtımal ózgerisi el Konstıtýtsııasymen tikeleı baılanysty bolatynyn aıtty.
- Negizgi zańdy referendýmda halyq qabyldady, qajet jaǵdaıda ózgeristi de halyq qabyldaıdy. Áńgime bılikti Prezıdent, Parlament jáne Úkimet arasynda bólýge baılanysty bolýy múmkin. Bul ózgerister álemdegi jáne eldegi ahýalǵa baılanysty bolady. Halyq qalasa, biz muny jaqsylap oılanatyn bolamyz, - dedi Nursultan Nazarbaev.
Memleket basshysy atqarýshy bılikte bolýy múmkin ózgeris týraly da oıyn bildirdi.
