Biz búkil álemge taǵy bir márte qoǵamymyzdyń demokratııalanǵanyn pash ettik- N. Nazarbaev
Astana. 4 sáýir. QazAqparat /Qanat Mámetqazyuly/ - Biz búkil álemge taǵy bir márte qoǵamymyzdyń demokratııalanǵanyn, sondaı‑aq óz jetistikterimizdi pash ettik.
3 sáýir kúni ótken QR Prezıdentiniń kezekten tys saılaýynyń alǵashqy nátıjelermen "Nur Otan" HDP-nyń Ortalyq apparatyndaǵy saılaýaldy shtabynda myńdaǵan jaqtastarymen birge tanysqan Elbasy Nursultan Nazarbaev osylaı málim etti.
«Qazir ǵana búgingi tarıhı sharanyń aldyn ala málimetteri belgili boldy. Bul shyn máninde tarıhı saılaý bolyp tabylady. Óıtkeni biz búkil álemge taǵy bir márte qoǵamymyzdyń demokratııalanǵanyn, sondaı‑aq óz jetistikterimizdi pash ettik. Bul kúni búkil álem óz nazaryn taǵy da Qazaqstanǵa aýdaryp, saılaý nátıjesin kútti. Saılaý ádil ári ashyq ótti. Quqyq qorǵaý organdary zańdylyqty qadaǵalady. Prezıdenttikke kandıdattardyń barlyǵyna teń quqyqtar men birdeı múmkindikter berildi. Biz ashyq qoǵambyz. Sondyqtan da osy sharany qadaǵalap, baıqaý úshin eldegi saılaýymyzǵa myńdaǵan sheteldik baıqaýshylar keldi, eki júzden astam sheteldik BAQ ókilderi tirkeldi. Olardyń barlyǵyna barynsha jaǵdaı jasaldy», ‑ dedi Elbasy.
Sonymen qatar N. Nazarbaev aldyn ala málimetterge súıene otyryp, qazaqstandyq jurtshylyqtyń basym bóligi kezekti ret reformany jaqtaǵanyn, qoǵamdy jańǵyrtý jolyn tańdaǵanyn, azamattardyń ahýalyn jaqsartý baǵytyn qoldaǵanyn atap ótti. «Saılaýda dál saılaý kúni emes, odan buryn jasaǵan isteriniń jeńiske jetedi. Endeshe bizdiń ótken jıyrma jylda júzege asyrǵan isterimiz beker bolmady. Bul sol baǵyttaǵy atqarylǵan isimizdiń baǵasy, synaǵy boldy», - degen Elbasy óziniń senimdi ókilderine, ásirese ózin jaqtaýda belsendilik tanytqan jastarǵa rızashylyǵyn bildirdi. Prezıdentke úmitker bolǵan basqa da kandıdattarǵa alǵysyn aıtyp, olardyń kótergen usynystaryna nazar aýdarý qajettigin eske saldy. «Bizdiń barlyq jetistikterimiz birliktiń nátıjesi. Kópultty Qazaqstannyń tatýlyǵynyń jemisi», - dedi N. Nazarbaev.
