Biz bolashaǵymyzǵa senimmen qaraımyz - qazaqstandyqtardyń Memleket basshysy atyna quttyqtaýlary
Bul týraly Aqordanyń baspasóz qyzmeti habarlady.
D.A.Qonaev atyndaǵy halyqaralyq qordyń ujymy naq Nursultan Nazarbaevtyń qaıratkerlik qyzmetiniń arqasynda Qazaqstan búkil álem daýsy jetken kópultty zamanaýı memleket bolyp otyrǵanyn atap ótken.
«Biz Siz úshin, eldiń damýy men ıgiligi jolyndaǵy Sizdiń ǵalamat eńbegińiz úshin orasan qýanysh pen maqtanysh sezimine bólenip otyrmyz. Memleketimiz Sizdiń basshylyǵyńyzben damyp kele jatqan kezde qazaqstandyqtar óz bolashaǵyna senimmen qaraıtyn bolady», - delingen hatta.
Qazaqstan Respýblıkasy Ulttyq ıadrolyq ortalyǵy qyzmetkerleri saılaý nátıjesi taǵy da halyqtyń óz Prezıdentine degen joǵary senimi men qoldaýynyń aıǵaǵyna aınalǵanyn aıtady.
«Bizdiń bárimiz memleket baǵytynyń nátıjesin kórip otyrmyz. Bul - birlik, turaqtylyq, kelisim, ósip-órkendeý jáne bolashaqqa umtylys. Sizdiń basshylyǵyńyzben Qazaqstan Respýblıkasy salystyrmaly túrde qysqa ýaqyt aralyǵynda syrtqy saıasat salasynda eleýli jetistikterge jetip, halyqaralyq qoǵamdastyqtyń bedeldi ári jaýapty múshesine aınaldy», - delingen quttyqtaýda.
Qazaqstan qurylysshylary qaýymdastyǵynyń músheleri saılaýshylardyń tańdaýy halyqtyń óz Prezıdentine degen sheksiz súıispenshiligi men ǵalamat senimin kórsetip otyrǵanyna toqtalady.
«Sizdiń arqańyzda Qazaqstan tanymastaı ózgerdi. Siz eldi danalyqpen, baıypty ári senimdi túrde turaqtylyq jolymen bastap kelesiz. Jalǵyz durys jol - osy. Kórshi elderde saıası daǵdarys dendep turǵan kezde turaqtylyq asa mańyzdy. Sonyń arqasynda bizdiń elimiz babalarymyzǵa arman bolǵan bıikterge qol jetkizdi», - delingen quttyqtaýda.
«Qazmyrysh» kompanııasynyń myńdaǵan adamdyq ujymy Nursultan Nazarbaevty prezıdenttik saılaýdaǵy aıqyn jeńisimen quttyqtaýdyń múmkindigi týǵanyna asa qýanyshty ekenderin aıtady.
«Táýelsiz Qazaqstannyń qalyptasýy men damýynyń kúrdeli kezeńinde ýaqyt synynan ótken Sizdiń halyqpen etene birligińiz tamasha nátıjelerge jetkizdi. Siz qazaqstandyqtardyń bilim alýy, densaýlyǵy, rýhanı-adamgershiligi máselelerin únemi nazarda ustadyńyz. Qazaqstan halqy Máńgilik el ıdeıasynyń rýhanı qýatyna súıene otyryp, ári qaraı ilgerileýge jáne tatýlyq pen qoǵamdaǵy kelisimdi saqtaýǵa degen umtylysyn taǵy dakórsetti», - dep jazady avtor.
«B.Nurjanov atyndaǵy Ekibastuz GRES-1» JShS jumysshylary Memleket basshysyn kezekten tys saılaýdaǵy jarqyn jeńisimen quttyqtady. «Biz Sizdiń jeńisińiz Qazaqstan damýynyń jańa kezeńin sıpattaıtynyna senimdimiz», - dep jazady avtorlar.
Almaty qalasyndaǵy lokomotıv paıdalaný deposynyń kópultty eńbek ujymy ózderiniń quttyqtaý hatynda búkil táýelsizdik jyldary boıy Nursultan Nazarbaevtyń basshylyǵymen júrip ótken joldyń qýatty jáne órkendep kele jatqan memleketti qurýdyń joly ekenine nazar aýdarǵan.
Almaty qalasynan «Rahat» AQ eńbek ujymy Nursultan Nazarbaevtyń aıqyn jeńisi halyqtyń óz kóshbasshysyna qaltqysyz senetininiń aıǵaǵy ekenin aıtqan.
«Daýys berý qorytyndylary siz júrgizip otyrǵan saıasatty jalpy halyqtyń qoldaıtynyn taǵy da kórsetti. Biz elimiz Sizdiń basshylyǵyńyzben kez kelgen qıyndyqty eńserip, budan da zor tabysqa jetetinine senimdimiz», - delingen hatta.
«Modern Media Group» JShS ókilderi qazaqstandyqtardyń tańdaýy ulttyń, el men álemdegi adamzattyń ıgiligine baǵyttalǵanyn atap ótken.
«Mundaı tutastyq demokratııanyń, adaldyqtyń, ashyqtyqtyń ári jańa jeńisterge qatysty úlken jaýapkershiliktiń jarqyn úlgisi bolyp sanalady. Halyq óz Prezıdentin jaqsy kóredi, oǵan baqyt, densaýlyq, uzaq ǵumyr, amandyq tileıdi. Qazaqstannyń jeńisti baǵdary Sizben birge ǵana múmkin bolady», - delingen hatta.
H.A.ıAssaýı atyndaǵy Halyqaralyq qazaq-túrik ýnıversıtetiniń ujymy Nursultan Nazarbaevtyń táýelsiz Qazaqstandy damytýǵa baǵa jetpes úles qosqanyn, sol úshin de el azamattary prezıdenttik saılaýda oǵan daýys bergenin aıtady.
Q.Sátbaev atyndaǵy Qazaq ulttyq tehnıkalyq ýnıversıtettiń oqytýshy-professorlar quramy memlekettiń bilim berý salasyn damytýǵa aıryqsha kóńil bólip otyrǵanyn, sonyń arqasynda oqý oryndary aıtarlyqtaı tabystarǵa jetip jatqanyn aıtqan.
«Bolashaqta ınstıtýtsıonaldyq reformalardy júzege asyrý aıasynda eldiń ǵylymy men bilimi budan da joǵary deńgeıge kóteriletinine senimdimiz», - delingen quttyqtaýda.
Qazaq memlekettik qyzdar pedagogıkalyq ýnıversıtetiniń ujymy men stýdentteri Qazaqstannyń álemge dostyq pen ózara túsinistiktiń, tutastyq pen birliktiń otany ekenin taǵy da tanytqanyna toqtalǵan.
«Biz Sizdi prezıdenttik saılaýda biraýyzdan qoldadyq, óıtkeni Qazaqstannyń jańa bıikterge shyǵýyn tek Sizdiń esimińizben baılanystyramyz», - dep jazady avtorlar.
Abaı atyndaǵy Qazaq ulttyq pedagogıkalyq ýnıversıtetiniń ujymy Qazaqstannyń táýelsizdik jyldary áleýmettik-ekonomıkalyq, mádenı-gýmanıtarlyq salalarda jetken tabystarynyń bári Memleket basshysy qyzmetiniń jemisi ekenine toqtalǵan.
Atyraý munaı jáne gaz ınstıtýtynyń oqytýshy-professorlar quramy men stýdentteri ótken prezıdenttik saılaý aǵa býymen men jas býynǵa birdeı mańyzdy ekenin, onyń barysynda Nursultan Nazarbaevty halyq bir aýyzdan qoldaǵanyn aıtady.
A.Seleznev atyndaǵy Almaty horeografııalyq ýchılışesiniń ujymy Elbasynyń basshylyǵymen memleketimiz halyqaralyq arenada, ekonomıkalyq damýda, respýblıkadaǵy turaqtylyq pen birlikti qamtamasyz etýde tabysqa jetkenin atap aıtqan.
«Evrazııa» halyqaralyq ekonomıkalyq akademııasynyń ókilderi Nursultan Nazarbaevtyń basshylyǵymen júzege asyrylyp jatqan ındýstrııalyq-ınnovatsııalyq jol el ekonomıkasyn damýdyń jańa belesine alyp shyǵaryna senim bildirgen.
«Búginde biz bolashaqqa batyl josparlar quryp jatyrmyz. Sizdiń búkilhalyqtyq mandatyńyz Eýrazııalyq ekonomıkalyq odaqtyń múmkindikterin nyǵaıtyp, onyń áleýeti men ıntegratsııalyq rólin álemdik keńistikte tolyqtaı paıdalanýǵa múmkindik beredi», - dep jazady avtorlar.
Oral jáne Aqtóbe arhıepıskopy Antonıı dinı basqarmanyń jáne Oral eparhııasynyń ókilderi atynan Nursultan Nazarbaevty Prezıdenttik laýazymǵa qaıta saılanýymen quttyqtap, myqty densaýlyq tilep, Qazaqstandy tabysty basqarýyna nıettestik bildirdi.
Ardagerlerdiń respýblıkalyq uıymynyń tóraǵasy Ó.Ozǵanbaev Nursultan Nazarbaevtyń prezıdenttik saılaýdaǵy jeńisi Memleket basshysynyń birlikti, ekonomıkalyq turaqtylyq pen tynyshtyqty, ultaralyq jáne dinaralyq kelisimdi saqtaýǵa baǵyttalǵan saıasatyna berilgen joǵary baǵa ekenin aıtady.
Memleket basshysyna qoldaý bildirip, «Ǵalymdar odaǵy» respýblıkalyq qoǵamdyq birlestiginiń músheleri, Jarkent qalasynan Jambyl atyndaǵy orta mekteptiń ujymy, Elbasynyń Almaty oblysy Qarasaı aýdanyndaǵy muǵalimderi men synyptastary da hat joldaǵan.
Sondaı-aq Qazaqstannyń eńbegi sińgen qaıratkeri, jazýshy S.Dosanov, Almaty qalasynan jazýshy Sh.Kumarova, Astana qalasynan Sotsıalıstik Eńbek Eri B.Shúkirbekov, Shyǵys Qazaqstan oblysy Semeı qalasynan «Abaı» jýrnalynyń bas redaktory M.Ospanov, Ulttyq ǵylym akademııasynyń akademıgi B.Jumaǵulov, Shymkent ýnıversıtetiniń professory N.Ótkelbaevtan da quttyqtaý hattary kelip tústi.
Osyndaı jyly lebizdi hattar Shyǵys Qazaqstan oblysy Shemonaıh aýylynan tyl ardagerleri Nıkıtınadan, Drıýchınadan, Fedorovadan jáne Borodınadan, Almaty oblysy Jaınaq batyr aýylynan O.Baıtoǵaevtan, Qyzylorda oblysy Qazaly qalasynan Z.Baımahanovadan, Almaty qalasynan J.Dáribaevadan, Astana qalasynan N.Cherpokovadan, Qaraǵandy qalasynan B.Ahmetov jáne Shymkent qalasynan O.Kóshekbaevtan keldi.