Biz birligimizben, yntymaǵymyzben myqtymyz - Danılbek Saratov
Qazaqstan halqynyń birligi kúnine oraı Oralda ótken merekelik sherýge qatysqan Danılbek Saratovtyń aıtýynsha, elimizde san ult ókilderi jarasymdy, tatý-tátti ómir súrip keledi.
- Osy oraıda Assambleıa Qazaqstanda birlik pen yntymaqty nyǵaıtýǵa uıytqy bolyp keledi, - dedi Danılbek Álıuly
- Ony taıaýda elordada ótken Qazaqstan halqy Assambleıasynyń HHVІІ sessııasynda taǵy bir márte aıqyn sezindik. Joǵary deńgeıde uıymdastyrylǵan bul tarıhı sessııanyń bir ereksheligi - oǵan Elbasymen birge elimizdiń qazirgi Prezıdenti tuńǵysh ret birge qatysty. Assambleıany óz qolymen quryp, ony úzilissiz basqaryp kele jatqan Nursultan Ábishuly Nazarbaev tebirene sóılep, bárimiz de adambyz ǵoı, sońynda kózine jas ta aldy. Aldymyzǵa jańa mindetter qoıdy. Sóıleýshiler de qysqa da nusqa aıtty. Biz sessııadan tyń kúsh-jigermen oraldyq. Rýhanı jańǵyrý baǵytynda kóp jumys jasaýǵa tıistimiz. Ásirese, jetkinshek urpaqqa durys tárbıe berip, ata-babalarymyzdan mıras bolyp kele jatqan ozyq salt-dástúrlerimizdi amanat etýimiz kerek.
- Bul sessııanyń taǵy bir ereksheligi, memlekettik tildi jetik meńgergen túrli ult ókilderiniń kóbeıip kele jatqanyn kórsetti. Bul jóninde ne aıtar edińiz?
- Árıne, qazaq tilin bilýdiń mańyzy zor. Elimiz táýelsizdik alǵannan bergi jıyrma jeti jyl ishinde memlekettik tildi meńgermesek, ol ózimiz úshin qolaısyz dep oılaımyn. Qazaqtaı keń peıildi halyqtyń ortasynda ómir súre otyryp, onyń tilin bilmeý syılamaýdyń kórinisi bolyp shyǵar edi. Bizge, Elbasymyz aıtqanyndaı, qazaq jáne orys tilderin bilý kerek. Batys Qazaqstan oblysy Reseıdiń bes birdeı óńirimen shektesedi. Sondyqtan kún saıyn derlik Reseıge saparlap shyǵyp jatamyz. Orys tilin bilmesek, qalaı júremiz? Oǵan qosa óz tilimizdiń de jóni bólek.
- «Vaınah» sheshen-ıngýsh qoǵamy da oblystaǵy túrli sharalarǵa belsene qatysatyn bolar?
- Iá, oǵan sóz bar ma! Bizdiń óńirde statıstıkalyq málimetterge qaraǵanda, 500-600-deı sheshen-ıngýsh turady. Árıne, budan da kóp bolǵanyn qalar edik. Halyq sanaǵynan keıin dál aıtýǵa bolatyn shyǵar. Biz, vaınahtar, eshqashan bólinbegen bir halyqpyz. Óz tilimizdi, salt-dástúrimizdi saqtaýǵa Oralda tolyq jaǵdaı jasalǵan, Dostyq úıinde jıi bas qosyp turamyz, túrli sharalardy ótkizemiz. Alda kezekten tys prezıdenttik saılaý kele jatyr. Oǵan da bir kisideı qatysyp, ózimiz qalaǵan kandıdat úshin daýys beremiz dep oılaımyn.
- Osydan 75 jyl buryn, Ekinshi dúnıejúzilik soǵys kezinde sheshen-ıngýsh halqyn Qazaqstanǵa kúshtep jer aýdarǵany belgili. Sizdiń halyqtyń tarıhyndaǵy bul qasiretti kezeń de esten ketpeıtin shyǵar?
- Iá, ol kezeń esh ýaqytta umytylmaıdy. Ózi de soǵys náýbetin basynan keshirip jatqan qazaq halqy sheshen-ıngýshtardy qushaq jaıa qarsy alyp, baýyryna basty. Sonyń arqasynda tiri qaldyq. Sonyń arqasynda sheshen-ıngýshtar Qazaqstanda óz ornyn taýyp, laıyqty ómir súrýge qoldaryn jetkizdi. 13 jyldan keıin kóptegen qandastarymyz qaıta kóship ketti. Qazaqstandy Otany sanap, qalǵandary az emes. Ákem óziniń máńgilik mekenin osy jerden tapty. Ózim jáne balalarym - qazaq jerinde dúnıege keldik. Qazir el qatarly turyp jatyrmyz, eshkimnen kem emespiz. Qazaq baýyrlarymyzben, basqa da ult ókilderimen mıdaı aralasyp kettik. Ózge ult ókilderimen qudandalas, týys ta bolyp jatyrmyz. Osynyń bári - birlik pen tatýlyqtyń arqasy. Biz qazaq halqyna árqashanda rızamyz, muny urpaǵymyzǵa da únemi aıtyp otyramyz.
- Sońǵy saýal, birneshe kúnnen keıin qasıetti Oraza aıy bastalady, ózińiz ustaıtyn shyǵarsyz?
- Bizdiń qoǵam músheleriniń bári oraza ustaıdy, namaz oqıdy. Barlyq musylman baýyrlarymyzdy Ramazan aıymen quttyqtap, osy aıdy Allaǵa qulshylyq etip, laıyqty ótkizýge senim, erik-jiger men tózim tileımin.
