Biz birgemiz: Túrkistan oblysynda 10 myńnan astam otbasyǵa kómek kórsetildi
Jetisaı aýdanynda 1 450, Saryaǵash aýdanynda 910 jáne Kentaý qalasynda 740 otbasyǵa kómek berilgen. Óńirde ıgi bastamany Nur Otan partııasynyń Túrkistan oblystyq fılıaly jáne aýdan, qalalardaǵy fılıaldary úılestirýde. Aktsııany júzege asyrý oblys ákimi, partııanyń oblystyq fılıalynyń tóraǵasy Ómirzaq Shókeevtiń tikeleı baqylaýynda tur. Koronavırýsqa qarsy kúresti kúsheıtý men áleýmettik az qamtylǵan otbasylarǵa kómektesý maqsatynda «Túrkistan» áleýmettik-korporatıvtik damý qory qurylyp, kásipkerler qomaqty úles qosty.
Qorǵa memlekettik qyzmetkerler bir kúndik jalaqysyn aýdarsa, jeke demeýshiler men aýdandyq máslıhattardaǵy partııa fraktsııasynyń músheleri, depýtattar aıryqsha kómektesip jatyr. Oblystyq «Atameken» kásipkerler palatasynyń Óńirlik keńesiniń músheleri men aýdan-qala ákimdikteri de qoldaý kórsetken.
Azyq-túlik qorjyny partııanyń aýdan, qalalyq fılıaldary arqyly «Baqytty otbasy», «Ardagerlerdi ardaqtaıyq», «Kedergisiz keleshek» jobalary boıynsha muqtaj jandarǵa jetkizilýde. Óz kezeginde «jasotandyqtar» men erikti jastar da, partııa qyzmetkerleri de demalyssyz jumys júrgizýde. Olar eldimekenderdi aralap, kómek jetkizgen. Partııanyń oblystyq fılıaly tóraǵasynyń birinshi orynbasary Beısenbaı Tájibaevtyń aıtýynsha, partııa fılıalynyń álýemettik jelidegi paraqshalaryna turǵyndardan ótinish óte kóp túsýde.
«Biz meılinshe árbir ótinishtiń oryndalýyna kúsh salyp jatyrmyz. On myńnan astam otbasyǵa azyq-túlik jetkizildi. Áli de kómek suraǵandar kóp. Maqsatymyz – kómekti shyn muqtajdarǵa jetkizý. Prezıdentimiz Qasym-Jomart Toqaev málimdemesinde memleket tarapynan berilip jatqan kómek týraly aıtty. Nur Otan partııasynyń da jemisti jumys atqaryp jatqanyna toqtaldy. «Biz birgemiz!» aktsııasy arqyly kómekke ıe bolǵan turǵyndar rızashylyǵyn bildirip jatyr. Óz tarapymyzdan partııa qyzmetkerlerine, kásipkerlerge, aýdan, qala ákimderi men «jasotandyqtarǵa», erikti jastarǵa jáne qıyn kezeńde túsinistik tanytyp otyrǵan elge alǵysymyzdy aıtamyz. Bul qıyndyqty birge jeńip shyǵamyz», – deıdi ol.
Aıta keteıik, «Biz birgemiz!» aktsııasy elimizde tótenshe jaǵdaı aıaqtalǵanǵa deıin jalǵasady dep josparlanyp otyr.
