Biz birgemiz: ShQO-da 29 myńnan astam adamǵa qarjylaı kómek kórsetildi

ÓSKEMEN. QazAqparat – Shyǵys Qazaqstan oblysynda «Biz birgemiz!» aktsııasy aıasynda 29 myńnan astam turǵynǵa qarjylaı kómek kórsetilgen, dep habarlaıdy QazAqparat tilshisi.

ShQO Jumyspen qamtý jáne áleýmettik baǵdarlamalardy úılestirý basqarmasynyń basshysy Jasulan Sársebaevtyń aıtýynsha, «Biz birgemiz!» aktsııasynyń birinshi kezeńinde óńirdiń 29 myńnan astam turǵynyna 1,5 mıllıard teńge kóleminde kómek kórsetildi. Sondaı-aq sáýir aıynda 77 myń adamdy azyq-túlikpen, turmysqa qajetti zattarmen qamtamasyz etý úshin bıýdjetten qosymsha qarajat bólindi.

«Tótenshe jaǵdaı kezinde tabysynan aıyrylǵandarǵa 42 500 teńge kóleminde áleýmettik tólem taǵaıyndaldy jáne ol bizdiń erekshe baqylaýymyzda. Qazirgi ýaqytta bul aqshalaı kómek 281 myń shyǵysqazaqstandyqqa berilgen», - deıdi basqarma basshysy.

Onyń aıtýynsha, «Qazpochta» AQ oblystyq fılıalynyń barlyq bólimshelerinde, qalalar men aýdandardyń jumyspen qamtý ortalyqtarynda 42 500 teńgege ótinish berý tártibi ret-retimen kórsetilgen aqparattyq stendter ornatylǵan.

«Azamattarǵa jedel qyzmet kórsetý maqsatynda oblystaǵy ekinshi deńgeıli bankter men poshta bólimsheleri mamandarynyń sany 1,5 esege kóbeıtildi. Sonymen qatar olardyń jumys ýaqyty esh demalyssyz kún saıyn 8.00-den 21.00-ge deıin uzartyldy», - deıdi Jasulan Sársebaev.