Biz birgemiz: Óńirlerde volonterler muqtaj jandarǵa qalaı kómektesip jatyr

NUR-SULTAN. QazAqparat – Adamzatty alańdatyp qoıǵan aty jaman aýrý, ókinishke qaraı, Qazaqstandy aınalyp ótken joq. 13 naýryz kúni Densaýlyq saqtaý mınıstri Eljan Birtanov Qazaqstannyń eki azamatynan koronavırýs ınfektsııasy tabylǵanyn málim etse, búgin aýrý juqtyrǵandar sany 35-ke jetti. QR Prezıdenti Qasym-Jomart Toqaevtyń Jarlyǵymen elde tótenshe jaǵdaı engizildi. «QazAqparat» tilshisi osyndaı syn saǵatta qoldan kelgen kómegin aıamaǵan kásipkerler men volonterlerdiń áreketine sholý jasady.

ORALDA TJ KEZІNDE 300-DEN ASTAM VOLONTER JUMYS ІSTEP JATYR

Batys Qazaqstan oblysy, Jastar saıasaty jónindegi basqarma janynan qurylǵan «Aq jaıyq jastary» volonterlik qozǵalysy Memleket basshysy elimizde tótenshe jaǵdaı jarııalaǵannan keıin halyqtyń kómekke muqtaj tobyna kómektesý týraly sheshim qabyldaǵan.

«Biz soǵys ardagerleri, kópbalaly analar jáne jalǵyzbasty adamdarǵa kómek kórsetemiz. Kómekti qajet etetin otbasylarǵa azyq-túlik jetkizip berý jáne azyq-túlik baǵalaryna monıtorıng jasaý sııaqty eki baǵytta jumys isteımiz. Ár volonterdiń monıtorıng jasaý boıynsha belgilengen óz ýchaskesi bar. Al azyq-túlik jetkizýge keler bolsaq, osy ýaqytqa deıin 70-ten astam mekenjaıǵa bardyq. Bul baǵytta biz eki túrli ádispen jumys isteımiz: qaıyrymdy jandar alyp qoıǵan azyq-túlikti jetkizip beremiz nemese úıden shyǵýǵa múmkindigi joq adamdarǵa azyq-túlik satyp alyp, jetkizip beremiz. Olar bizge chekte kórsetilgen aqshany beredi», - deıdi Batys Qazaqstan oblysy, Jastar saıasaty jónindegi basqarma basshysy Nurhat Orash.

Oral qalasynda Tótenshe jaǵdaı kezinde 300-den astam volonter jumys isteıdi.

«Al bizdiń saıtymyzǵa 7 myńnan astam volonter tirkelgen. Kómekke muqtaj adamdar bizdi kóbinese saıt arqyly tabady jáne WhatsApp arqyly habarlasady», - deıdi ol.

ÓSKEMENDІK VOLONTERLER DÁRІ-DÁRMEK JETKІZÝMEN AINALYSÝDA

Óskemen qalasyndaǵy volonterler de qarttar men múmkindigi shekteýli jandarǵa azyq-túlik pen dári-dármek jetkizýmen aınalysýda. https://kaz.inform.kz/news/volonterler-karttar-men-mugedekterge-azyk-tulik-dari-zhetkizip-beredi_a3625979

«Koronavırýstyń aldyn alý maqsatynda qalamyzda volonterlerdiń bastamasymen qarttarǵa jáne múmkindigi shekteýli adamdarǵa azyq-túlik pen dári-dármek jetkizý qyzmeti iske qosyldy», - deıdi qala ákimi Jaqsylyq Omar.

1981 JYLǴY VOLONTERLER ESTAFETANY 1980 JYLǴY TÚLEKTERGE BERDІ

Tótenshe jaǵdaı kezinde eriktiler azyq-túliý, dári-dármek jetkizýmen shektelip jatqan joq. Qostanaılyq volonterler muqtaj jandarǵa járdemdesip, aýyl ishindegi qar tazalaý jumystaryna atsalysýda.

Amangeldi aýdany ortalyǵyndaǵy 3 mekteptiń 1981 jylǵy túlekteri az ýaqyt ishinde aýdandaǵy 7 otbasyǵa jaqsylyq jasady. Olar qaıyrymdylyq estafetasyn Amangeldi aýdanynyń 1980 jyly týylǵan túlekterine joldap, saýapty shara jalǵasyn tapty.

«MENІŃ PODЪEZІM – MENІŃ DENSAÝLYǴYM» ChELLENDJІ

Al Aqmola oblysynyń jastary koronavırýs ınfektsııasy taralýynyń aldyn alý maqsatynda jańa chellendj bastap ketti.

«Meniń podezim – meniń densaýlyǵym» chellendji barysynda jastar oblys ortalyǵyndaǵy turǵyn úıler men iri saýda úıleriniń kire berisin tazalap, súrtip, koronavırýs ınfektsııasynyń aldyn alý týraly jadynama taratýda. Bul da – aty jaman indettiń aldyn alýǵa arnalǵan áreketterdiń biri.

KOLLEDJ VOLONTERLERІ MASKANY TEGІN TARATÝDA

Túrkistan oblysynyń eriktileri óńirde saqtyq sharalaryn júrgizýge qolǵabys etýde.

Tólebı aýdanyndaǵy medıtsına kolledjiniń volonterleri 100 dana medıtsınalyq maskany qoldan tigip, kópbalaly otbasylarǵa berýde. Jastar sondaı-aq, qoǵamdyq oryndarda arnaıy daıyndalǵan jadynama taratyp júr. Soynmen qatar, túsindirý jumystarymen de aınalysady.

***

Osylaısha elimizdiń batysy men shyǵysynda, soltústigi men ońtústiginde qıyn sátte muqtaj jandarǵa qol ushyn sozǵan volonterler uazaqstandyqtardyń rızashylyǵyna bólenip jatyr.