Biz birgemiz: Qostanaı oblysynda 22 myń otbasy qarjylaı kómek aldy

QOSTANAI.QazAqparat – Elbasy Nursultan Nazarbaevtyń bastamasy boıynsha qurylǵan «Birgemiz» qory kómekke zárý azamattarǵa qoldaý kórsetýdi jalǵastyrýda. Osy aptada 80 qostanaılyq birrettik qarjylaı qoldaýǵa ıe bolady. QazAqparat bul týraly «Nur Otan» partııasynyń Qostanaı oblystyq fılıalyna silteme jasap habarlaıdy.

Sonymen, Qostanaı oblysynda halyqtyń áleýmettik álsiz tobyna jatatyn turǵyndarǵa 50 myń teńge birrettik tólem aýdarýdyń tórtinshi legi bastaldy. Jyl basynan beri óńirde 22 myńǵa jýyq otbasy qarjylaı qoldaý alǵan.

«Osy aptanyń sońyna deıin aımaqtyq qamqorshylar keńesiniń sheshimimen, 50 myń teńge kólemindegi bir rettik tólem eldi mekenderdegi 80 otbasyna baǵyttalady. Bul maqsatta «Birgemiz» qoryna kásipkerlerdiń qoldaýymen 28 mlrd teńge qarajat jınalǵan. Bir rettik tólem alýǵa quqyly muqtaj azamattar tizimi jergilikti jumyspen qamtý jáne áleýmettik baǵdarlamalar bólimi arqyly jasalǵan. Halyqtyń áleýmettik osal toptaryna antıseptıkter, maskalar jáne birinshi qajettilik ónimderi de jetkizilýde. Azyq-túlik sebetine makaron, qaraqumyq, kúrish, qant jáne ósimdik maıy, qara shaı, tuz, tátti nan kiredi», - deıdi partııa ókilderi.

«Nur Otan» partııasynyń Qostanaı oblystyq fılıaly Elbasy jobasyn júzege asyrýda aýyl sharýashylyǵy taýar óndirýshileri men kásipkerlerdiń belsendi jumysyn atap ótti.