Biz birgemiz: Atbasarlyqtar Maqtaaralǵa gýmanıtarlyq kómek jiberdi

KÓKShETAÝ. QazAqparat – Barlyǵy 20 tonna azyq-túlik pen turmystyq zattar tıelgen gýmanıtarlyq júk Atbasar qalasynan Túrkistan oblysynyń sý tasqynynan zardap shekken Maqtaaral aýdanyna jóneltildi, dep habarlaıdy QazAqparat tilshisi aýdan ákimdigine silteme jasap.

«2014 jáne 2017 jyldary sý tasqynynan zardap shekken Atbasar turǵyndary qıyndyqqa tap bolǵan maqtaaraldyqtardyń jaǵdaıyn jaqsy túsinedi. El basyna kún týǵan shaqta qazaq halqy aýyzbirshilik pen yntymaqtyń arqasynda barlyq qıyndyqtardy jeńe bilgen. «Jumyla kótergen júk jeńil» demekshi osyndaı kómekti uıymdastyrýǵa úlesin qosqan barsha atbasarlyq kásipkerlerge, jastarǵa shynaıy alǵysymyzdy bildiremiz!», - dedi Atbasar aýdany ákiminiń orynbasary Abaı Bekbaev.

Ákimdiktiń málimeti boıynsha, bul atbasarlyqtardyń sý tasqynan zardap shekken Maqtaaral aýdanynyń turǵyndaryna jiberip jatqan gýmanıtarlyq kómeginiń ekinshi legi. Alǵashynda 25 tonna un jóneltilgen bolatyn.