Biz birgemiz: Almaty oblysynyń polıtseıleri azyq-túlik paketterin taratty

TALDYQORǴAN. QazAqparat - Almaty oblysynyń polıtseıleri «Biz birgemiz!» aktsııasyna qoldaý bildirdi. Óńirlik Polıtsııa departamenti Krımınaldyq polıtsııa basqarmasynyń qyzmetkerleri zeınetkerlerge, kópbalaly jáne az qamtylǵan otbasylarǵa azyq-túlik taratty, dep habarlaıdy QazAqparat tilshisi.

«Biz halyqtyq aktsııany úlken yqylaspen qoldaımyz. Taldyqorǵan qalasynda turatyn kópbalaly otbasylar men zeınetkerlerge, ómirdiń qıyn jaǵdaıyna tap bolǵan jalǵyzbasty analarǵa azyq-túlikpen kómek kórsetý týraly sheshim qabyldadyq. Karantın rejımindegi tyıymdarǵa baılanysty zeınetkerlerimiz dári jáne azyq-túlik taýarlaryn alý úshin taıaýdaǵy azyq-túlik dúkenine bara almaı, qıyn jaǵdaıǵa tap boldy. Oǵan sebep, zeınet jasyndaǵy adamdarda vırýs juqtyrý qaýpiniń joǵary bolýy. Bul jaǵdaılardyń bárin eskerýge tyrystyq. Osyǵan oraı, olarǵa aldyn ala habarlasyp, qajetti dári-dármek pen azyq-túliktiń tizimin alyp, birinshi suranysqa ıe taýarlardy jetkizdik», - dep atap ótti Almaty oblysy PD Krımınaldyq polıtsııa basqarmasynyń bastyǵy Dáýren Sákenov.

Polıtseılerdiń qoldaýyna ıe bolǵan jandardyń biri 5 balanyń anasy Nargız.

«Bir qap un, bes lıtr shemishkeniń maıy, balalarǵa táttiler, kúrish, qant, makaron ónimderi - bir sózben aıtsam,qajettiniń bárin ákep berdi. Tártip saqshylaryna úlken alǵys bildiremin», - dedi Eskeldi aýdanyndaǵy Qarabulaq aýylynyń turǵyny Nargız.

Atqaratyn qyzmetteriniń qıyndyǵyna qaramastan, polıtseıler qaıyrymdylyqty jalǵastyrýdy kózdep otyr, osyǵan baılanysty muqtaj jandardyń kezekti tizimi jasaldy.

«Barlyq azamattardy úıde qalýǵa, jeke gıgıena normalaryn, zańnamany jáne barlyq saqtyq sharalaryn saqtaýǵa shaqyramyz. Tek birliktiń arqasynda ǵana biz ýaqytsha qıyndyqtardy jeńe alamyz», - dep tolyqtyrdy podpolkovnık Sákenov.