#Biz birgemiz: Agenttik qyzmetkerleri elordany qardan tazartý isine úles qosty

NUR-SULTAN. QazAqparat – QR Memlekettik qyzmet isteri agenttiginiń ókilderi #Biz birgemiz chellendjin qoldap, elordany qardan tazartý isine úles qosty, dep habarlaıdy QazAqparat.

«Tolassyz jaýǵan qar elordany qar qursaýynda qaldyrdy. Qazirgi tańda mektep, aýrýhanalar sııaqty mańyzdy áleýmettik nysandar men jeke sektorlardy qar basyp qaldy. Qar jınaıtyn tehnıkalar toqtaýsyz jumys istep jatyr. Qala turǵyndary men eriktiler jaǵdaıdyń qıyndyǵyn túsine otyryp, kommýnaldyq sala qyzmetkerlerine kómek kórsetýde. Osy rette, El Prezıdenti Qasym-Jomart Toqaevtyń jarııalaǵan Eriktiler jyly belsendi azamattar arasynda erkin kómek berýge qýatty serpin berdi. Memleket basshysy korporatıvtik eriktiler qyzmetiniń damýynyń mańyzdylyǵyn atap ótken bolatyn. Osyǵan qaraı Memlekettik qyzmet isteri agenttiginiń elordalyq departamentiniń ujymy áleýmettik jelilerde iske qosylǵan #Bizbirgemiz chelendjine qoldaý kórsetip, qar jınaýǵa shyqty»,-delingen departamenttiń Facebook-tegi paraqshasynda.

«Memlekettik qyzmetshiler birinshi kezekte jeke sektorda turatyn jalǵyzbasty qart adamdaryń úıiniń aınalasyn qardan tazalaýǵa kómektesti. Departamenttiń qyzdary dastarhan jaıyp, tańerteńnen qar jınaýǵa shyqqan jumysshylarǵa ystyq túski as berdi»,-delingen habarlamada.

Aıta keteıik, elorda jastary áleýmettik jelide qar kúreý chellendjin bastady. Elorda eriktilerin Memleket basshysy Qasym-Jomart Toqaev ta qoldady .