Biz bilim beremiz, al ony qoldanýǵa úıretpeımiz - mınıstr B. Jumaǵulov
ASTANA. 23 tamyz. QazAqparat - Jaqynda mektep oqýshylarynyń bilimine júrgizilgen ulttyq monıtorıng biraz kemshilikterdi anyqtady. Bul týraly búgin Tamyz konferentsııasynyń plenarlyq májilisinde QR Bilim jáne ǵylym mınıstri Baqytjan Jumaǵulov aıtty.
Onyń habarlaýynsha, oqýshylardyń talqylaý, salystyrý, qorytyndy jasaý jáne dáleldeý qabiletteriniń tómen dárejede ekendigi anyqtaldy. «Negizgi baǵdar tek bilim berý tásiline ǵana baǵyttalady. Al osy bilimdi is júzinde paıdalaný damymaı otyr. Bıylǵy Ulttyq biryńǵaı testileýdiń logıkalyq tapsyrmalary da atalǵan kemshiliktiń bar ekendigin kórsetti», - deıdi B.Jumaǵulov.
Mınıstrdiń sózine qaraǵanda, búginde fýnktsıonaldyq saýattylyqty damytýdyń Ulttyq jospary qabyldandy. Al álemdik tájirıbe negizinde ázirlengen jalpyǵa mindetti bilim berýdiń jańa memlekettik standarttary alǵash ret pánderdiń mazmunyn emes, oqýshylardyń praktıkalyq daıyndyǵyn shyńdaýǵa múmkindik bermek.
