Biz bastaǵan isti kim jalǵastyrady? - akademık Q.Ormantaev
ASTANA. 14 maýsym. QazAqparat - Qazaqstanda balalar densaýlyǵyn baqylaıtyn mamandar jetispeıdi. Búgin Astanada bastalǵan «Ana men bala densaýlyǵynyń ózekti máseleleri» taqyrybyndaǵy konferentsııada Qazaqstandaǵy balalar hırýrgııasynyń negizin salýshy, akademık Qamal Ormantaev osy máseleni kóterdi.
«Búginde Qazaqstanda osy túıtkildi sheshý jolynda da biraz jumystar atqarylyp jatyr. Árıne, jetistikter bar. Degenmen, sheshilmeı jatqan máseleler de joq emes», - deıdi Q.Ormantaev. Onyń habarlaýynsha, qazirgi kezde respýblıka boıynsha ana men bala densaýlyǵy jaıy medıtsına salasynyń 60 paıyzyn qamtıdy. «Endi qarańyz, Qazaqstanda 16,5 mln. halyq bar. Onyń 40 paıyzy aýylda turady. Al sol jerde bolǵan azamattar ondaǵy medıtsınanyń jaǵdaıyn jaqsy biledi ǵoı», - deıdi ǵalym.
Sondaı-aq Q.Omantaev elimizdegi joǵary oqý oryndarynda pedıatrııa fakýltetteriniń jabylýyna alańdaýshylyq bildirdi. «Qazirgi kezde Almatyda pedıatr mamandar jetispeıdi. Neonotologtardyń jaǵdaıy da qıyn bolyp tur. Jaqynda bir top azamattar osy máselege qatysty Parlament Májilisiniń depýtaty Darıǵa Nazarbaevǵa hat joldaǵan bolatyn. Onyń kómegi bolady dep senemiz. Men aıtaıyn, bizdiń jasymyz keldi. Endi, biz bastaǵan isti kim jalǵastyrady?», - deıdi Q.Ormantaev.
