Biz bárine jaýapty ultpyz - senator Nurtóre Júsip
«Parlament palatalarynyń birlesken otyrysynda Qazaqstan Prezıdenti Qasym-Jomart Toqaev halyqqa Joldaý jasady. Memleket basshysynyń Joldaýyn muqııat tyńdadym. Sonda ańǵarǵan bir nárse – Prezıdent birneshe márte «Ulttyq» degen sózge ekpin túsirdi. «Ulttyq múdde», «Ulttyq joba, «Ulttyq ekonomıka», «Ulttyq ındýstrııa», «Ulttyń jańa bolmysy», «Ult sapasy» degen sózderge erekshe mán berý kerek dep esepteımin. Muny Qasym-Jomart Kemeluly tekten tekke aıtyp otyrǵan joq. Biz bárine de jaýapty ultpyz. Prezıdent elimizdiń pandemııa tusyndaǵy tynys-tirshiligine toqtala kelip, «Sapalyq turǵydan múlde jańa ulttyq ındýstrııany damytý úshin jańǵyrtylǵan zańnamalyq negiz qajet», - dep atap kórsetti. Sondaı-aq, «Ulttyq ekonomıkanyń strategııalyq qýatyn arttyrý úshin tez arada qaıta óńdeý isiniń jańa salalaryn damytý qajet. Bul qara jáne tústi metallýrgııa, munaı hımııasy, kólik qurastyrý jáne mashına jasaý, qurylys materıaldary men azyq-túlik óndirý jáne basqa da salalardy qamtıdy» degen sózi óte ózekti», - dedi senator.
Onyń atap ótýinshe, Memleket basshysy «Ulttyń jańa bolmysy» degen máselege arnaıy toqtaldy. «Qazirgi mindet – halqymyzdyń jańa bolmysyn qalyptastyrý, tutas ult sapasyn arttyrý. Adamdy jáne qoǵamdy ýaqyt talabyna saı jetildirý qajettigin ómirdiń ózi kórsetip otyr. Jańarǵan ult qana jańǵyrǵan eldiń jetistigin jahan jurtyna tanyta alady», - degen ustanymy kóptiń kókeıinen shyqty.
«Memleket basshysy halqymyzdyń boıynda álem úlgi tutarlyq jaqsy qasıetteriniń kóbirek bolǵanyn qalaıtynyn aıtty. «Ultymyz jańa sapaǵa kóshýi úshin bizdiń kúndelikti ómirlik ustanymdarymyz da ózgerýi kerek. Qazaq qoǵamynda jańa qaǵıdattar jáne jańa baǵdarlar saltanat qurýǵa tıis. Ult ustazy Ahmet Baıtursynuly: «Bilimdi bolýǵa oqý kerek. Baı bolýǵa kásip kerek. Kúshti bolýǵa birlik kerek. Osy kerekterdiń jolynda jumys isteý kerek» deıdi. «Bul kózqaras búgingi kúni óte mańyzdy», - dep qazaq ultyna qajet sapalyq qasıetterdi sanamalap berdi. «Birinshiden, jıyrma birinshi ǵasyrdyń urpaǵy tereń bilimdi bolǵany jón. Ekinshiden, jas býyndy erinbeı eńbek etýge beıimdeý qajet. Úshinshiden, kez kelgen isti kásibı daǵdy arqyly júzege asyrǵan durys. Tórtinshiden, temirdeı tártip jáne joǵary jaýapkershilik barshamyzdyń boıymyzda bolýy kerek. Besinshiden, ádildikten aınymaǵan jón. Ádildik – qoǵam damýynyń mańyzdy sharty. Ádilettilik – ásirese, el-jurttyń taǵdyryn sheshý úshin asa qajet qasıet. Altynshydan, bizge keregi – adaldyq, uqyptylyq, tııanaqtylyq. Bárimiz naǵyz qazaqty dál osyndaı keıipte kórgimiz keledi. Biz sonda ǵana básekege qabiletti memleket, zııatker ult qalyptastyra alamyz. Qazaq zııalylarynyń jańa kezeńdegi mindeti – ult bolmysynyń jańa qaǵıdattaryn ornyqtyrý. Sondaı-aq, ult sapasyn arttyrýǵa atsalysý. Jańǵyrǵan qoǵam jat ádetterden birtindep arylýy kerek. Ysyrapshyldyq pen dańǵazalyq qoǵamnyń da, adamnyń da abyroıyn tógedi. Jaýapsyzdyq, nemquraılylyq búkil eldi qasiretke ushyratady. Al, bos sózdilik pen bóspelik, maqtanshaqtyq qoǵamnyń damýyn tejeıdi. Bul týraly uly Abaı «Óńkeı jalǵan maqtanmen, shynnyń betin boıaıdy» dep ashyq aıtqan. Bul másele búgingi kúni de ózekti bolyp otyr. Bıik muratqa jeteleıtin eńbek degen uly uǵymdy ár azamattyń sanasyna sińirgenimiz jón», - degen tujyrymyn halyq barynsha qoldaıdy dep senemin», - dedi Nurtóre Júsip.
Senator Prezıdent Qasym-Jomart Toqaevtyń halyqqa Joldaýyndaǵy negizgi túıin «Bizdiń elimizde «Jaýapty memleket – jaýapty qoǵam – jaýapty adam» júıesi berik ornyǵýy kerek» degen paıymda jatqandyǵyn basa aıtty.
«Zamana aǵysy qazir bostan bos júrýdi, bosteki sózdi, berekesiz tirlikti kótermeıdi. Bıylǵy Joldaýdaǵy basty erekshelik – bárinen buryn adam faktoryna, azamattardyń erik-jigeri men kúsh-qaıratyna kóp nárse baılanysty ekenin ańǵartady. Sondyqtan, asqaq uransyz, lepirme jáne daýryqpa tirliktersiz naqty ispen aınalysýdyń kezeńi jetti. Ultymyzdyń jedel jańǵyrýy – halyqtyń tastaı jumylǵan birligi men usynyqty tirligine baılanysty. Osyny esten shyǵarmasaq deımin», - dep túıindedi Nurtóre Júsip.
