Biz balamaly energetıkany damytýmen tereń aınalysýymyz kerek - N.Nazarbaev
ASTANA. 7 jeltoqsan. QazAqparat - «Biz balamaly energetıkany damytýmen tereń aınalysýymyz kerek», dedi Elbasy Nursultan Nazarbaev «Nazarbaev Ýnıversıtetinde» stýdentterdiń saýaldaryna bergen jaýabynda.
«Qazaqstan elektr qýatynyń nebári 1 paıyzyn ǵana balama jolmen óndiredi. Sondyqtan da biz qazir birneshe jobany zerdelep jatyrmyz. Mysaly, bizdiń ónertapqysh Albert Bolotov jańa jel generatoryn oılap tapty. «Qazatomónerkásip» kompanııasy Shyǵys Qazaqstandaǵy mashına zaýytynda qazirgi tańda osyndaı generatordyń jıyrma danasyn jasap qoıdy, biz jel energııasynda 100 megavatqa deıin energııa óndire alamyz», - dedi Elbasy óz sózinde.
Prezıdent sondaı-aq, Qazaqstanda sý energetıkasynyń damý perspektıvasy úlken ekenin, kún batareıalary óndirisiniń de múmkindigi bar ekenin - Qaraǵandyda metall kremnııin óndiretin zaýyt salynyp bitkenin aıtty. Oǵan qosa, bıologııalyq energetıkany damytý jospary taǵy bar.
