Biz balalardy qutqarýdy ǵana oıladyq –Atyraýlyq polıtseı
Eske sala ketsek, polıtsııa qyzmetkerleri bıylǵy qańtarda Jaıyq ózeninde muz astyna túsip ketken eki balany qutqarǵan edi. Qaýip-qaterge bas tikse de, olar ózderin batyr sanamaıdy. «Biz tek balalardy qutqarýdy ǵana oıladyq. Bizdiń ornymyzda ózgeler bolsa, olar da dál solaı áreket eter edi», - deıdi olar. Beıbit kúnniń batyry atanǵan polıtseıdiń biri Qýandyq Súıindikov sol kúngi oqıǵanyń qalaı órbigenin bylaısha eske túsiredi
–Bıylǵy 4 qańtarda polıtsııa aǵa leıtenanty Tımýr Balmaǵanbetovpen birge kezekshilikte edim. Keshki saǵat 19:40-ta kezekshi bóliminen Jaıyq ózenine 4 balanyń sýǵa batqany jóninde shuǵyl habar tústi. Dereý qyzmettik kóligimizben Jaıyqqa ózeniniń jaǵasyna jettik. Keshki mezgil bolǵandyqtan, aınala qarańǵy edi. Onyń ústine qalyń tuman tústi. Ózen ústinen eshteńe kórinbeıdi. Tek balalardyń «Qutqaryńdar» degen daýsy úzilip estiledi. Daýys shyqqan jaqqa baǵyt aldyq. Tez jetkimiz-aq keledi. Biraq, muzdyń ústimen júgirýge bolmaıdy. Óıtkeni, juqa muz oıylyp ketýi múmkin. Muz ústimen eńbektep júrýge týra keldi.
–Balalar oınap júrip, muzǵa túsip ketken be?
–Bul jerde balalardy kinálaýǵa bolmaıtyn shyǵar. Kezinde ózimiz de bala bolyp, oıynnyń qyzyǵyna berildik ǵoı. Bular da oıynnyń qyzyǵymen qarańǵynyń túskenin baıqamaǵan. Mektep jasyndaǵy 4 bala muz ústinde oınap júrip, jaǵadan 15 metrge deıin alystaǵan. Juqa muz oıylyp, tórteýi de sýǵa túsip ketken. Bireýi 102 nómirine telefon shalyp úlgergen. Balalardyń bireýi óz betimen muz ústine shyǵyp úlgergen. Al, bireýi sýǵa batyp, ony qutqaryp qalý múmkin bolmady.
Biz balalardyń daýsy shyqqan tusqa jaqyndaǵanda, muzdan 2 balanyń basy kórinip turdy. Tımýr ekeýmizge birdeı jaqyndaýǵa bolmaıdy. Sebebi, bizdiń salmaǵymyzben muz odan saıyn oıylyp ketýi múmkin. Sondyqtan, Tımýr meniń aıaǵymnan ustap, men balalarǵa qolymdy sozdym. Áýeli bireýin, keıin ekinshisin sýdan shyǵaryp aldyq.
–Balalardy sýdan shyǵarǵanda, jedel járdem kútip turǵan bolar?
–Iá, shuǵyl habardy alǵannan keıin jedel járdemge, tótenshe jaǵdaı qyzmetine habar berdik. Balalardy qutqarǵan sátte olardyń ábden jaýrap, tońǵanyn kórdik. Kıimderi de sýǵan malshynǵan. Qol-aıaqtary qurysyp, sóıleýge shamalary kelmedi. Ústindegi sý kıimderin sheship alyp, ózimizdiń kıimimizge orap aldyq. Sóıtip, jedel járdem dárigerlerine tapsyrdyq.
–Ómirińdi qaterge tigý ońaı emes, qorqynysh bolǵan joq pa?
–Shynymdy aıtsam, sol sátte tek balalardy qutqarýdan basqa eshteńe oılap úlgermedim. Keıin Tımýrdan da suradym. Ol da tek balalardy qutqarýdy oılapty. Óıtkeni, biz polıtsııa qyzmetkerlerimiz ǵoı. Kez kelgen ýaqytta kómek berýge daıyn bolýymyz kerek. Bul –bizdiń mindetimiz. Sondyqtan, sol kúni biz tek balalardyń ómirin saqtap qalýǵa umtyldyq. Al, qorqynysh deısiz be, esimde joq. Biraq, bizge qorqynyshqa boı aldyrýǵa ýaqyt bolmady. Eger biz qorqatyn bolsaq, qoǵamnyń tynyshtyǵyn kim kúzetedi? Kim qoǵamdyq tártiptiń saqtalýyn qadaǵalaıdy? Osy turǵydan aıtqanda, biz óz mindetimizdi ǵana oryndadyq.
–Polıtsııa qatarynda qashannan beri jumys isteısiń?
–Qoǵamdyq tártip kúzetshisi bolý –bala kúnnen bergi armanym. Sondyqtan, 2014 jyly osy salaǵa jumysqa turdym. Sodan beri polıtsııa qatarynda qyzmet atqaryp kelemin. Al, Tımýr áriptesim bul salaǵa 2018 jyly keldi.
–Ózderińdi beıbit kúnniń batyry degenge kelisesiń be?
–Bul endi artyqtaý aıtylǵan teńeý shyǵar. Shyn máninde biz erlikke jatqyzatyndaı erekshe áreket jasaǵan joqpyz ǵoı. Bizdiń ornymyzda ózge adamdar bolsa, solar da biz sekildi áreket eter edi. Sondyqtan, erlik jasadyq dep oılamaımyn. Biz qyzmettik mindetimizdi adal atqaryp júrmiz.
Al, durysynda naǵyz erlikti jasaǵan biz emes. Naǵyz batyrlar –Ekinshi dúnıejúzilik soǵysqa qatysqan ardagerlerimiz. Tylda eńbek etken atalarymyz ben ájelerimiz. Olar búgingi urpaqtyń beıbit ómiri úshin qar jastanyp, muz tósenip, jaýǵa qarsy soǵysty. Tyldaǵy eńbekte mańdaı terin tókti.
–Áńgimeńe rahmet.
